«Пляжнэ» самбэмкIэ Урысыем и Кубок икъыдэхын фэгъэхьыгъэ зэнэкъокъухэр Iоныгъом и 8 – 9-м Краснодар краим икъалэу Анапэ щыкIуагъэх. Iофтхьабзэм спортсмени 150-м ехъу хэлэжьагъ.

Адыгэ Республикэм илIыкIохэм гъэхъэгъэшIухэр ашIыгъэх, хагъэу­нэфыкIырэ чIыпIэхэр къафагъэшъошагъэх. Тыгъужъ Тимур текIоныгъэр къыдихыгъ, Кобл Рэмэзан ятIонэрэ хъугъэ. Мэлгощ Адам, Анцокъо Амир ыкIи Бэгъ Салим джэрз медальхэр къахьыгъэх. Тиспортсменхэм ыкIи ахэм ятренерхэу А. Делэкъом, А. Хьабэхъум, Р. Джарымэкъом, А. Джарымэкъом, А. Гъомлэшкым ыкIи Б. Шъэу­мэным тафэгушIо.