Урысыем и Къыблэ щыпсэурэ лъэпкъхэм культурэмрэ спортымрэкIэ я Фестиваль къалэу Севастополь щыкIуагъ. Къыблэ ыкIи Темыр-Кавказ федеральнэ шъолъырхэм ялIыкIохэр Iофтхьабзэм хэлэжьагъэх. Ахэм ахэтыгъэх Адыгэ Республикэм икIыгъэхэри.

Мы фестивалыр 2010-рэ илъэсым щегъэжьагъэу рагъэкIокIы. Мыгъэрэр зыфэгъэхьыгъагъэр Хэгъэгу зэошхом ТекIоныгъэр къызщыдахыгъэм ия 80-рэ илъэс ары. Къыблэм ыкIи Темыр Кавказым якомандэхэр Iэпэ­Iэсэныгъэу аIэкIэлъымкIэ зэхъожьынхэм, джащ фэдэу культурэм ылъэныкъокIэ шъолъырхэм гъэхъагъэу яIэхэр къагъэлъэгъонхэм ар фэIорышIэ. Программэм къыдыхэлъытэгъагъэх культурнэ ыкIи спорт Iоф­тхьабзэхэр.
Мэфищрэ кIогъэ фестивалыр зэ­къошныгъэм ыкIи зыкIыныгъэм ятамыгъэ хъугъэ. Ащ испорт зэфэхьысыжьхэмкIэ, Адыгеим хагъэунэфыкIырэ чIыпIэ къыдихыгъэп. Севастополь пэрытныгъэр ыубытыгъ, Дагъыс­таным ятIонэрэ чIыпIэр къыфагъэшъошагъ, Чэчэн Республикэр ящэнэр. Iофтхьабзэм зэкIэмкIи нэбгырэ 1500-м ехъу хэлэжьагъ.