АР-м и ЛIышъхьэу ­КъумпIыл Мурат иунашъокIэ республикэм ия 34-рэ илъэс ихэгъэунэфыкIын фэгъэзэгъэ зэ­хэщэкIо комитетэу ­агъэнэфагъэм апэрэ ­зэхэсыгъо иIагъ. Ар зэ­ри­щагъ АР-м и ЛIышъхьэ­рэ АР-м иминист­рэхэм я Кабинетрэ я Админ­истрацие ипащэу ­Владимир Свеженец.

Аужырэ илъэсхэм хабзэ зэрэхъугъэу, чъэпыогъум и 5-м Адыгеим и Мафэ дакIоу Мыекъуапэ загъэпсы­гъэри зэрэхэдгъэунэфыкIыщтыр ыпэрапшIэу къэзэрэугъоигъэхэм агу къыгъэкIы­жьыгъ. Ахэр ифэшъуашэу зэ­хэщэгъэнхэм амалэу щыIэр зэкIэ ехьылIэгъэн зэрэфаер къыхигъэщыгъ.
МэфэкI Iофтхьабзэхэр зы­фэдэщтхэм къытегущыIагъ АР-м лъэпкъ IофхэмкIэ, Iэ­кIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу Долэ Долэт. Ащ къызэриIуагъэмкIэ, чъэпыогъум и 1-м къыще­гъэжьагъэу тхьамафэм къыкIоцI мэфэкI Iофтхьабзэхэр Мыекъуапэ щыкIощтых. Анахь цIыфыбэ къэзыугъоищтхэр чъэпыогъум и 3-м аублэщтых. Адыгеир загъэпсыгъэм фэ­гъэхьыгъэ мэфэкI зэхахьэр а мафэм щыIэщт. Iофтхьэбзэ шъхьаIэхэр мэфэкI мэфэ шъып­къэм, чъэпыогъум и 5-м, рекIокIыщтых. Къалэм гупчэу, зыгъэпсэфыпIэу иIэхэм зэ­кIэми ащыжъотыщт. Мэздахэ щагъэпсыгъэ кIэлэцIыкIу джэгупIэми анахь цIыкIухэм апае Iофтхьэбзэ гъэшIэгъонхэр щызэхащэщтых. Джащ фэ­дэу шыгъачъэ щыIэщт. МэшIоустхъор мэфэкIым икIэух хъущт. ПстэумкIи, къэгъэлъэгъонхэри, концертхэри, фэшъхьафхэри зэхэтэу Iофтхьэбзэ 200-м ехъу агъэ­нэфагъ. Культурнэ программэр зыфэдэщтым шъхьафэу къытегущыIагъ АР-м культурэмкIэ иминистрэ игуадзэу Ольга Гавшинар. ОрэдыIо, къэ­шъокIо купхэм, IэпэIасэхэм ямастер-классхэм цIыфхэр агъэчэ­фыщтых. Ащ фэшъхьафэу, рес­публикэм и Мафэ ихэгъэунэфыкIын къыдыхэлъытагъэу шъолъыр зэфэшъхьафхэр зыхэлэжьэрэ фес­тивалэу «Театральное зазеркалье» зыфиIорэр чъэпыогъум и 2 — 6-м Мыекъуапэ щыкIощт. АР-м и Лъэпкъ театрэ, Нысхъэпэ театрэм акIыгъухэу Къалмыкъым, Къэ­бэртэе-Бэлъкъар Республикэм, Ростов ыкIи Новгородскэ хэкухэм къарыкIыщт артистхэр ащ хэлэжьэщтых.
Къалэм анахь шъхьаIэу зэхищэщтхэм къащыуцугъ Мыекъуапэ ипащэу Геннадий Митрофановыр. МэфэкI Iофтхьабзэхэр админист­рацием чъэпыогъум и 3-м еублэх. Муниципальнэ шIухьафтынэу Соловьев зэшхэм ацIэкIэ агъэнэ­фагъэм мыгъэ илауреат хъущт нэбгырищэу агъэнэфагъэхэм ацIэ къызщыраIощт Iофтхьабзэр зэхащэщт, Щытхъум идэпкъ зисурэтхэр къытырагъэуцощт нэбгырэ 12-м ар къэзыушыхьатырэ тхылъхэр аратыжьыщтых. ГъэшIэгъонэу ра­хъухьэхэрэм ащыщ кофем ифес­тивалэу Лениным ыцIэ зыхьырэ пчэгум чъэпыогъум и 4-м щыре­кIокIыщтыр.
МэфэкI Iофтхьабзэхэм язэхэщэн АР-м ныбжьыкIэ IофхэмкIэ и Комитет чанэу хэлэжьэнэу Влади-
мир Свеженец зафигъэзагъ. Къэ­кIорэ зичэзыу зэхэсыгъом зытегущыIагъэхэм язэшIохыкIэ хъущтыр гъэнэфагъэу къекIолIэнхэу пшъэ­рылъ къафишIыгъ.
МэфэкI Iофтхьабзэхэр джащ фэдэу республикэм ирайонхэм ыкIи икъалэхэм ащыкIощтых. Ахэр щы­нэгъончъэнхэм хэбзэухъумакIохэр лъы­плъэщтых, гъэлъэшыгъэу Iоф ашIэщт.