Урысые экологие Iофтхьабзэу «Зеленая Россия» зыфи­Iорэм къыдыхэлъытагъэу 2025-рэ илъэ­сым иIоныгъо мазэ Адыгеим шэмбэт шIыхьафхэр щыкIощтых.

БлэкIыгъэ шэмбэтым шъолъырым ит псэупIэхэм зэкIэми гъэкъэбзэн Iоф­тхьабзэхэр ащызэхащэ­гъагъэх.
Ахэм язэхэщэн ыкIи республикэм ичIыпIэхэм якъэбзэныгъэ санитар шапхъэхэм адиштэу шIыгъэным фэгъэхьыгъэ унашъом АР-м и ЛIышъхьэ кIэтхагъ. Ащ къызэрэди­лъытэрэмкIэ, чIыпIэ зыгъэ­IорэшIэжьыпIэхэм Iоныгъо мазэм шIыхьафхэр ащызэхащэнхэ, къэралыгъо хэбзэ къулыкъухэр ахэм ахэлэжьэнхэ фае.
Ащ тетэу, гущыIэм пае, къалэу Мыекъуапэ щы­кIогъэ гъэкъэбзэн Iоф­шIэнхэм яшIуагъэкIэ пы­дзэфэ кубометри 100 фэ­диз да­щыгъ, хэбзэн­чъэу хэкIитэкъупIэ ашIыгъэ чIы­пIэхэр агъэкъэбзагъэх. Фэтэрыбэ хъурэ унэхэм ящагухэм ыкIи чIылъэ унэхэм апэIулъ чIыпIэхэм цIыфхэм гъэкъэбзэн Iоф­тхьабзэхэр ащызэшIуа­хыгъэх.

Джащ фэдэу Шэуджэн районым шэмбэт шIы­хьафэу щыкIуагъэм цIыфыбэ хэлэжьагъ. Урамхэр, паркхэр, общественнэ чIыпIэхэр агъэкъэбзагъэх, хэкI дзыо пчъагъэ дащыгъ. Гурыт еджапIэ­хэм, кIэлэцIыкIу IыгъыпIэхэм, культурэм иучреж­дениехэм аIыгъ чIыпIэхэр зэIуахыгъэх, чъыгхэр ащагъэтIысхьагъ. КIэлэеджа­кIохэр, организациехэм ыкIи хъызмэтшIапIэхэм яIофы­шIэхэр, гуфакIохэр, адми­нистрацием илIыкIо­хэр шIы­хьафым чанэу хэлэжьа­гъэх.
Кощхьэблэ районым ипсэупIэхэми шэмбэт ­шIы­хьафыр жъотэу ащыкIуагъ. Огъум ыгъэгъугъэ пкIа­шъэу къетэкъохы­гъэхэр псэу­пIэ урамхэм ащап­хъэнкIыгъэх, чъыгхэр аукIэрэпхъу­хьа­гъэх, къулыкъу пэпчъ зы­фэгъэзэгъэ чIыпIэр ыгъэ­къэбзагъ. ЗэрэошIугъэм ишIуагъэкIэ Iофыбэ псэу­пIэхэм ащызэшIуахыгъ. Арэу щытми, джыри Iоф­шIэныбэ зэрапыщылъыр хагъэунэфыкIызэ Iоныгъом къыщызэкIэлъыкIощт шэмбэтхэм ащызэшIуахыщт Iофтхьабзэхэр агъэнэ­фагъэх.