Къанэкъо Салим итекIоныгъ
ДзюдомкIэ Къыблэ федеральнэ шъолъырым ипервенствэу къалэу Ермэлхьаблэ щыкIуагъэм Адыгеим испортсмен гъэхъэгъэшIу щишIыгъ, текIоныгъэр къыщыдихыгъ.
2009 — 2011-рэ илъэсхэм къэхъугъэ кIалэхэм ыкIи пшъашъэхэм зэнэкъокъум зыщаушэтыгъ.
Адыгеим икомандэ кIэлэ 45-рэ ыкIи пшъэшъэ 11 хэтыгъ. ЗэкIэмкIи Iофтхьабзэм нэбгырэ 585-рэ хэлэжьагъ.
Кощхьэблэ районым ибэнакIоу Къанэкъо Салим килограмм 46-м нэс къэзыщэчыхэрэм якуп зыщиушэтыгъ. Ащ ухьазырыныгъэ дэгъу къыгъэлъэгъуагъ ыкIи къытефэу апэрэ чIыпIэр къыдихыгъ. Тренерэу Дэгужъые Мухьамэд ыгъэсэрэ спортсменым зэIукIэгъуиплI иIагъ. Краснодар краим илIыкIохэу Самвел Петросьян, Тимур Бареевым, Максим Плешневым ыкIи финалым Кирилл Гусевым ар ябэныгъ ыкIи зэкIэми атекIуагъ. Дышъэ медалэу къыхьыгъэм дакIоу Адыгеир ыкIи Къыблэ федеральнэ шъолъырыр Урысыем ипервенствэ къыщигъэлъэгъонхэу ащ фитыныгъэ къыдихыгъ. Джы ар къэралыгъом идзюдоист анахь лъэшхэм ябэныщт. IэпэIэсэныгъэу IэкIэлъым ыкIи тренерскэ штабым иIэпыIэгъу яшIуагъэкIэ тиспортсмен ныбжьыкIэ гъэхъэгъэшIухэр зэришIыщтхэм уицыхьэ тебгъэлъы хъущт.
Шъолъыр спорт федерациехэмрэ Адыгеим и Правительствэрэ сэнаущыгъэ зыхэлъ спортсменхэм сыд фэдэрэ лъэныкъокIи IэпыIэгъу афэхъух, спорт инфраструктурэм хэхъоныгъэ ышIыным анаIэ тырагъэты. Къанэкъо Салим итекIоныгъэ джыри зэ къеушыхьаты ащ фэдэ лъэбэкъухэм мэхьанэшхо зэряIэр.