Псы тонн 20 афатIупщыгъ
Донецкэ Народнэ Республикэр псымкIэ гумэкIыгъо хэт. Адыгэ Республикэр джыри ахэм IэпыIэгъу афэхъу, Донбасс щыпсэухэрэм гуфэбэныгъэу афыряIэр ащкIэ тицIыфмэ къагъэлъагъо.
Адыгэ Республикэм щылэжьэрэ Народнэ фронтым ДНР-м зичэзыу шIушIэ IэпыIэгъур – зашъохэрэ псы тонн 20 ытIупщыгъ. ГукIэгъу зыхэлъ цIыфхэмрэ организацие зэфэшъхьафхэмрэ яшIуагъэкIэ Iофтхьабзэр агъэцэкIэн алъэкIыгъ. Псыр икъоу зыщамыгъотырэ шъолъырымкIэ а IэпыIэгъум мэхьанэшхо иI. Къыхэгъэщыгъэн фае, мыщ фэдэ Iофтхьабзэр Народнэ фронтым зэрэзэхищэрэр апэрэп, чэзыу-чэзыоу ар ахэм агъэцакIэ.
Мызыгъэгум зашъохэрэ псыр къаIэкIэзыгъэхьагъэр компаниеу ООО «Траст М» зыфиIорэр ары, ащ мызэу, мытIоу щыкIагъэ зиIэмэ ишIуагъэ аригъэкIызэ, социальнэ пшъэдэкIыжьэу ыхьырэр къегъэшъыпкъэжьы. ШIушIэ IэпыIэгъум икъэугъоин ыкIи ар игъом зищыкIагъэхэм алъыгъэIэсыгъэныр Народнэ фронтыр ары зипшъэрылъыгъэр.
«Тэ зэрэтлъытэрэмкIэ, ащ фэдэ IэпыIэгъур ягъэгъотыгъэныр гукIэгъум ишапхъэ къодыеу щытэп, тигражданскэ пшъэрылъ. Мафэ къэс цIыфым псыр ищыкIагъ, ащ ткъошхэр щыкIэхэ хъумэ, тIэ афэтщэин ыкIи тиамал къыхьырэр зэкIэ афэтшIэн фае, — къыддэгощагъ Максим Жиденкэр, ООО «Траст М» зыфиIорэм изэхэщакIо.
«Ящэнэрэ хьылъэзещэ машинэу псы тонн 20 зэрыфэрэр ттIупщыгъэ. Донецкэ Народнэ Республикэм щыIэ Народнэ фронтым щылэжьэрэ тиIофшIэгъухэм псыр зищыкIагъэмэ алъагъэIэсыщт: сымэджэщхэм, сэкъатныгъэ зиIэ цIыфхэм, пенсионерхэм ыкIи нэмыкIхэм. ДНР-м псы Iофыр щагъэтэрэзыжьыфэ, тэ IэпыIэгъур дгъэуцущтэп, — къыхигъэщыгъ Юрий Гороховым, Народнэ фронтым Адыгэ РеспубликэмкIэ икъутамэ игъэцэкIэкIо комитет ипащ.
Зашъохэрэ псэу атIупщыгъэр аужырэ шIушIэ IэпыIэгъоу щытэп. Народнэ фронтым зашъохэрэ псым иугъоин Адыгеим щылъегъэкIуатэ, гукIэгъу зыхэлъ цIыфхэмрэ организациехэмрэ а Iофтхьабзэм къыхэлэжьэнхэу къырегъэблагъэх.