Красногвардейскэ районым ит псэупIэу Большесидоровскэм дэт фельдшер-мамыку IэзапIэм терапевт иIэ зыхъугъэр бэшIагъэп. Хьаткъо Альбинэ федеральнэ программэу «Земский доктор» зыфиIорэмкIэ ащ кIуагъэ. Специалист ныбжьыкIэм пэIудзыгъэ къоджэ псэупIэм Iоф щишIэныр къыхихыгъ ыкIи программэм къызэрэдыхэлъытагъэу, ащ сомэ миллион 1,5-рэ къыратыгъ.

Мыекъопэ къэралыгъо технологическэ университетым имедицинэ Институт Iэзэн IофымкIэ ифакультет 2021-рэ илъэсым къыухи, а илъэс дэдэм мы апшъэрэ еджапIэм иординатурэ чIэ­хьагъ ыкIи IофшIэныр Адыгэ республикэ клиническэ сымэджэщым щыригъэжьагъ. Илъэс заулэрэ ащ Iутыгъэу, амал щыIэ зэхъум, къэралыгъо IэпыIэгъур къызфигъэфеди, къоджэ псэупIэм дэсхэм ишIуа­гъэ аригъэкIынэу къэкIуагъ.
Врач сэнэхьатыр къыхихыным лъапсэ фэхъугъэм тыщигъэгъозагъ IофышIэ ныбжьыкIэм.
— Мы сэнэхьатыр къыхэзыхыгъэ­хэм янахьыбэр яцIыкIугъом къыщегъэжьагъэу агукIэ фаехэу фэкIох, ау сэ ахэм сащыщэп. Теубытэгъэ пытэ хэлъэу къыхэсхыщт сэнэхьатыр сшIэщтыгъэп, сигупсэхэм сытырагъэгушIухьагъ. Апэ сестринскэ гъэсэныгъэ зэзгъэгъотынэу хъугъагъэ ыкIи гъэшIэгъоныр, а IофымкIэ апэрэ практикэм сызэкIом, джащ дэжьым дэгъоу къызгуры­Iуагъ ащ нэмыкI сэнэхьат сызэрэфэмыер, сыгу лъэшэу рихьыгъ, ары пакIошъ, сыфаблэу езгъэ­жьагъ, — къыIуагъ Альбинэ.
Участковэ терапевт ныбжьыкIэр зыIут IэзапIэм Большесидоровскэм дэсхэм ямызакъоу, Джамбэчые щыпсэухэрэри епхыгъэх. Селом нэбгырэ мини 2 фэдиз, кIэлэцIыкIухэри ахэтхэу, щэпсэух, къуа­джэм — нэбгырэ 400.
— Зы мафэм нэбгырэ зыхыбл къытэ­уалIэу къыхэкIы, — къеIуатэ Альбинэ. — Сымаджэу зиунэ тыкIон фаеу хъухэрэри къахэкIых. Апэрэ мафэхэм бэп къакIощтыгъэр, джы врач яIэ зэрэхъугъэр зэлъашIагъэу нахь зыкъытфагъазэ хъугъэ. ЦIыфхэм лъэшэу ягуап чыжьэу кIонхэ имыщыкIагъэу, япсауныгъэ ауплъэкIуныр Iэрыфэгъу зэрашIыгъэр. Врач сэнэхьатыр зызэзгъэгъотыгъэр илъэсиплI нахь мыхъугъэми, Iэзэн Iофым сызыхэтыр илъэсипшI хъугъэ. Мэзитфэу мыщ Iоф зыщысшIэрэм къыщыублагъэу къысэолIэгъэ сымэджабэм адэбз узыр ыкIи нэмыкI уз хэужъыныхьагъэхэр яIэхэу къыхэзгъэщыгъ. Мы мэфэ фабэхэу блэкIыгъэхэм лъэшэу лъыдэкIуаем, гуузым, пэтхъу-Iутхъум ыгъэгумэкIыхэрэм япчъагъэ зыкъы­Iэтыгъагъ. Джащ фэд, къытэуа­лIэхэрэм янахьыбэм Iэпкъ-лъэпкъ узхэр яIэх. Гу-лъынтфэ узхэмрэ Iэпкъ-лъэпкъ узхэмрэ апэрэ чIыпIэм щытых, ахэм къакIэлъэкIо тхьабыл зэхэтхэм япхыгъэ узхэр. Хэти зэрифэшъуашэу ищыкIэгъэ уплъэкIунхэр есэгъэшIых, Iэзэгъу уцхэр къафисэтхыкIы.
IофшIэныр ебгъэжьэгъакIэ хъумэ, къиныгъохэм уарихьылIэу къыхэкIы, цIыф сымаджэхэр къыпщыгугъыхэу уадэжь къызыкIохэкIэ, ахэм ялажьэр тэрэзэу бгъэунэфын ыкIи зэрищыкIагъэм фэдэу уяIэзэн фае. АщкIэ упчIэжьэгъоу врач ныбжьыкIэм иIэхэр илъэс пчъагъэ хъугъэу Iоф зышIэрэ иIофшIэгъухэу Адыгэ республикэ сымэджэщым Iутхэр, Красногвардейскэ райн гупчэ сымэджэщым иврач шъхьаI ары. ЗэрафэлъэкIэу зэкIэ къыгурагъаIо, джэуапынчъэу зыкIи къа­гъанэрэп.
ТигущыIэгъу къызэрэхигъэщыгъэмкIэ, IэпэIэсэныгъэшхо зыIэкIэлъ врачхэм рагъэджагъэх, ахэм шIэныгъэу къаратыгъэр джы иIофшIэнкIэ къышъхьапэжьы. Ау ащ укъыщыуцунэу щытэп, уврач хъумэ, ренэу уишIэныгъэхэм ахэбгъахъо­зэ улэжьэн фае, ащ тапэкIэ зэрэпылъы­щтыр Хьаткъо Альбинэ къыхигъэщыгъ.
Врач ныбжьыкIэм иIофшIэн зэрифэшъуа­шэу зэрэзэхищэщтым емызэщыжьэу ыуж ит, цIыфхэм зыкъаригъэштэн ылъэ­кIыгъ. Ар сымаджэхэм IэпыIэгъу зэра­фэхъурэм дакIоу жэбзэ дахэкIэ къеуалIэхэрэм апэгъокIы. Джащ фэдэ врач губзыгъэ ныбжьыкIэхэр нахьыбэу тищыкIагъэх.
— Узым зыгу ыгъэцIыкIугъэ цIыфэу къыоуалIэрэм изытет къыбгурыIон, икъоу ар зэрэзэхэпшIыкIырэр зэхебгъэшIэн фае. Гуфэбэны­гъэ­рэ жэбзэ дахэрэ пэбгъохымэ, гумэкIыгъоу иIэр нахь псынкIэу щыгъэзыягъэ хъущт. ЫшIэн ымышIэу, гумэкIыгъо имыIэу зыпари уадэжь къызэрэмыкIощтыр гъэнэфагъэ. ЗипсауныгъэкIэ нахь хьылъэу къысшIошIырэ сымаджэхэр къалэм сэгъакIох, синэIосэ врачхэм сафыте­ошъ, анаIэ къатырагъэтынэу сязэгъы, — хигъэунэфыкIыгъ Альбинэ.
ТигущыIэгъу IэпыIэгъу зищыкIагъэу къеолIэрэ сымаджэм сыдигъуи ишIуагъэ ригъэкIыныр — пшъэрылъ шъхьаIэу зыфигъэуцужьыгъ ыкIи ащ зэрифэшъуа­шэу фэкIо.
ГущыIэуж: Адыгэ Республикэм медицинэ IофышIэхэм япчъагъэ зэрэфэныкъор дэгъэзыжьыгъэным пащэхэр ренэу ыуж итых ыкIи ащ епхыгъэ Iофэу зэшIуахырэр макIэп. Ахэм зэу ащыщ къэралыгъо программэу «Земский врач» зыфиIорэр. Ар зыщыIэм къыщегъэжьагъэу нэбгырэ 591-мэ ар къызфагъэфедагъ. Мы илъэсыр къызихьагъэм къыщыублагъэу программэхэу «Земский фельдшер» ыкIи «Земский врач» зыфиIохэрэм медицинэ IофышIэ 20-м ехъу ахэлэжьагъ.
Iэшъынэ Сусан.