Мысатыу организациеу «Заповедный Кавказ» зыфиIорэм зекIозещэхэм язичэзыу егъэджэн ыублагъ. ЧIыопсымкIэ шIэныгъэкIуапIэ хъурэ зекIоным ылъапсэхэр арагъэшIэщтых.

Хабзэ зэрэхъугъэу, «Единэ Россием» и штаб егъэ­джэнхэр щэкIох. Апэрэ сыхьатхэр зекIозещэхэм яIэгъахэх. Экологическэ лъэныкъом фэгъэзагъэу «Заповеднэ Кавказым» щылэжьэрэ Жанна Фроловам проектым ипшъэрылъхэмрэ имурадхэмрэ, кIэ­лэегъаджэу яIэщтхэм еджа­кIохэр нэIуасэ афишIыгъэх. Теорием фэшъхьафэу дэкIыгъо мафэхэри афызэхащэщтых.
— ХэушъхьафыкIыгъэу къагъэгъунэрэ чIыпIэу Урысыем иIэхэм язэхэтыкIэ «ЧIыопс зекIоным иэтикэ» зыфиIорэ апэрэ десэу тиегъэджэн ылъапсэу хъурэр зэхэтфыгъах. Сэгугъэ уахътэу тадэжь щагъэкIощтым зэкIэхэмкIи шIуагъэ хэлъынэу, — къыIуагъ мысатыу организациеу «Заповедный Кавказ» зыфиIорэм щылэжьэрэ Жанна Фроловам.
ЗэкIэмкIи нэбгырэ 29-рэ егъэджэнхэм ахэлажьэ. Пстэури Iоф зышIэрэ зекIозещэх, ау зэрылэжьэхэрэ уахътэр зэфэшъхьаф: зыгорэм илъэсипшIым къехъугъэу шъолъырым ихьакIэхэр республикэм нэIуасэ фешIых, адрэм ар ригъэжьэгъэ къодый.

КъэIогъэн фае, цIыфхэм ящыIэкIэ-псэукIэ нахьышIу шIыгъэнымкIэ Урысыем и Президент игрантхэм къадыхэлъытэгъэ ахъщэмкIэ Iофтхьабзэр зэхэщагъэ хъугъэ. Ащ иамалкIэ организацием мыщ фэдэ егъэджэнхэр зэрэзэхищэхэрэр ятIонэр. Мы илъэсым иублэгъум «Заповеднэ гъуазэм иеджакIу» зыфиIорэр ригъэкIокIыгъ. Мызыгъэгурэм ащ лъыпидзэжьырэм фэдэу мэхъу, ау зэхъокIыныгъэхэр, хахъохэр фашIыгъэхэу, географиеми зиушъомбгъугъэу — Пшызэ шъолъырри къыхагъэхьагъ.
— Фондым ятIонэрэу ахъщэ IэпыIэгъур къызэрэтитыгъэм, гъо­зэ-зекIозещэхэм яшIэныгъэ­хэм ахэдгъэхъонэу джыри зэ цыхьэ къызэрэтфашIыгъэм тэркIэ осэшхо иI. Арышъ, пшъэдэ­кIыжьыр фэдитIоу зэхэтэшIэ, сыда пIомэ КъохьэпIэ Кавказым идэхагъэ зекIохэр магнитым фэдэу Адыгеими Пшызэ шъолъыри къарещалIэх. ЧIыопс кIэныр къэухъу­мэгъэным, ахэм зекIоным ылъэныкъокIэ хахъо ягъэшIыгъэным апае заповеднэ шапхъэхэр икъоу бгъэцэкIэнхэ фае, — къыхигъэщыгъ мысатыу организациеу «Заповеднэ Кавказым» ипащэу Алексей Бибиным.
Шъолъырым къихьэрэ хьакIэхэм чIыопсым фыряIэщт фыщытыкIэр, къызэраухъумэн фаер зыгъэпсырэр зекIозещэр ары. Арышъ, чIыналъэм инэшанэхэр, псэушъхьэу, къэкIырэ лъэп­къэу, хьэцIэ-пIацIэу зэлъызыубытыхэрэр дэгъоу ышIэнхэ, чIыопсымкIэ шIэныгъэкIуа­пIэ хъурэ зекIоным имэхьанэ икъоу къыгурыIон фае. Егъэджэнхэр джары зыфытегъэпсыхьагъэхэри.