Iоныгъом и 6-м къыщегъэжьагъэу къэралыгъо ушэтын зымыкIугъэ зекIозещэу е гъозэ-зэдзэкIакIоу зекIон фэIо-фашIэхэр зыгъэцакIэрэм гущыIэкIэ апэ къегыищтых, нэужым административнэ тазыр тыралъхьащт. Ащ фэгъэхьыгъэ хэбзэгъэуцугъэм къэралыгъом и Президент бэдзэогъум и 7-м кIэтхагъ.

Административнэ хэбзэгъэуцугъэм къыдыхэлъытэгъэ зэхъокIыныгъэхэр зылъыIэсыщтхэр аттестацие зымыкIугъэ­хэу зекIохэр шъолъырым ичIыпIэхэм нэIуа­сэ афэзышIыхэу, лъагъохэм арызыщэхэрэр ары. ЦIыф къызэрыкIомкIэ тазырыр сомэ миниблым къыщегъэ­жьагъэу пшIым нэсы, юридическэхэмкIэ — сомэ мин шъэныкъом къыщегъэжьагъэу минишъэм нэс. ГъогогъуитIо хэбзэгъэуцугъэр ыукъуагъэу къыхагъэщырэм ыпщыныщтыр зэхапшIэу нахьыб: цIыф къызэрыкIомкIэ ар сомэ мин щэкI — шъэныкъо, юридическэхэмкIэ сомэ минишъэ — шъэрэ шъэныкъорэ.
Джащ фэдэу зекIозещэм ыцIэ, ылъэ­къуацIэ зытетхэгъэ бгъэхэлъыр хэгъэнэгъэн фае, арэущтэу щымытмэ, ащи тазыр къыдыхэлъытагъ. ЗекIохэм фэIо-фашIэхэр ягъэгъотыгъэнымкIэ фэшъхьаф хэбзэукъоныгъэхэми гъунэ алъафыщт.
ЗэхъокIыныгъэхэм инструктор-гъуазэхэри къахеубытэх. Ахэр зекIохэм зыщягъусэнхэ фэе лъагъохэр блэкIыгъэ илъэсым агъэнэфагъэх.

Шъугу къэдгъэкIыжьын, мы илъэсым игъэтхэпэ мазэ къыщегъэжьагъэу зекIозещэхэу Iоф зышIэн гухэлъ зиIэхэм къэралыгъо ушэтыныр шIокI имыIэу акIун фае. Ащ техьажьынхэмкIэ илъэс хъурэ фэгъэкIотэн пIалъэ яIагъ. Непэрэ мафэм ехъулIэу УрысыемкIэ зекIозещэ мин 11-м нахьыбэм ушэтыныр акIугъ ыкIи къэралыгъом экономикэ хэхъоныгъэмкIэ и Министерствэ иреестрэ хэтхагъэх. Ар шапхъэ.
Адыгеими ар щагъэцакIэ. ЯтIонэрэ илъэс хъугъэу зекIозещэхэм, гъуазэхэм, инструкторхэм къэралыгъо ушэтыныр аты. Джырэ уахътэм ехъулIэу Iоф ышIэнымкIэ лицензиер нэбгырэ 60-м нахьыбэмэ къыда­хыгъ. Илъэситф пIалъэ ащ иI. Игъо зикIыкIэ, икIэрыкIэу ушэтыныр атын фае. Къэралыгъо ушэтынхэмкIэ комиссие шъхьаф зэхэщагъэу республикэм щэлажьэ.
ЗекIозещэхэм алъэныкъокIэ IофшIэныр гъэлъэшыгъэныр уахътэм къыгъэуцугъэ Iофыгъу. Аужырэ уахътэм фемыджагъэ­хэу зекIохэр къезыщэкIыхэрэм япчъагъэ зэхапшIэу хэхъуагъ. ЧIыпIэ кIоцI зекIоным зызыщиушъомбгъурэ лъэхъаным мыщ фэдэ IофшIэным федэ хэзылъагъо­рэр нахьыбэ хъугъэ. Ау ахэм ащыщ­хэр IофшIэным фэхьазырхэп, зыщылэжьэхэрэ шъо­лъырым илъэпкъ тарихъ, икультурэ икъоу ашIэрэп, чIыналъэм щыгъуазэхэп, зекIо купым ищынэгъончъа­гъи мэхьанэ ратырэп. Ар дэгъэзыжьыгъэным фэшI аттестацие шIыкIэмкIэ ахэм яхэшыпыкIын хэбзэ лъапсэ иIэ хъугъэ. ЗекIозещэу Iоф ышIэнымкIэ тхылъым икъыдэхын кIэлъэIу зышIоигъор къэралыгъо фэIо-фашIэхэм янэкIубгъо, МФЦ-м яамалхэр къызфигъэфедэнхэ ылъэкIыщт.

Анцокъо Ирин.