Лъэпкъ проектэу «ПсэупIэр ыкIи къэлэ щыIакIэр» зыфиIорэм ишIуагъэкIэ зыгъэпсэфыпIэ чIыпIакIэхэр Мыекъуапэ щагъэпсых. Адыгеим щыпсэухэрэр ыкIи ихьакIэхэр лъэшэу ахэм ащэгушIукIых, якIуапIэх.

АР-м и Концерт зэхахьэ зикIэщэкIо зэIухыгъэ къэгъэ­лъэгъонхэр АР-м и Къэралыгъо филармоние, Мэздахэ, къэлэ паркым адэжь мы гъэмафэм бэу ащызэхащагъ.
Къэралыгъо академическэ ансамблэу «Налмэсым» иоркестрэ, Къэралыгъо симфоническэ оркестрэм, ансамблэу «Ислъамыем», Камернэ музыкальнэ театрэм, ансамблэу «Ошъутенэм», оркестрэу «Русская удаль», АР-м и Нысхъэпэ театрэу «Дышъэ къошыным» якъэгъэлъэгъонхэр зэкIэлъыкIоу а чIыпIэхэм къащатыгъэх. Ахэм цIыфыбэ зэращалIэ. Къэлэдэсхэм ямызакъоу, Мыекъуапэ къеблэгъэгъэ хьакIэхэри ягуапэу къякIуалIэх.
ЦIыф псэупIэхэр гуIэтыпIэ хъунхэм пае ахэм ащызэшIуахырэ гъэкIэжьын IофшIэнхэм артистхэм зэIухыгъэ къэгъэлъэгъонхэр къызщатын алъэкIыщт пчэгухэр яIэнхэр къащыдалъытэх. Къэралыгъо филармонием пэIулъ чIыпIэр ащкIэ щысэшIу.
АР-м и Концерт зэхахьэ концертхэм язэхэщэнкIэ ипащэ игуадзэу Кукэнэ Алий къызэрэтиIуагъэмкIэ, Мыекъуапэ изэIухыгъэ пчэгухэм ыпэкIэ зэрагъэнэфагъэу, къэгъэлъэгъон 50 фэдиз ащыкIуагъ. КъэшъокIо, орэдыIо купхэм, театрэхэм якъэгъэлъэгъонхэр ахэм ахэтых.
— АР-м и Концерт зэхахьэ хэт купи 8-р Iоф­тхьабзэхэм ахэлэжьагъэх. Филармонием пэIулъ скверым нэмыкIэу зыгъэпсэфыпIэ мэз паркэу Мэздахэ, Лениным ыцIэ зыхьырэ пчэгум, къэлэ паркым иконцерт пчэгоу «Ракушка» зыфаIорэм, Шъхьэгощэ нэпкъэу Мые­къуапэ итамыгъэу мыIэрысэр зытырагъэуцуагъэм зэIухыгъэ концертхэр ащызэхэт­щагъ. Iоныгъо мазэм ыкIэ нэс джыри а чIыпIэхэм къэгъэлъэгъонхэр къащыттыщтых, — къыIуагъ Кукэнэ Алий.
ЗыгъэпсэфыпIэ чIыпIакIэхэм язэхэщэнкIэ, Мыекъуа­пэ зекIохэр нахьыбэу къещэлIэгъэнхэмкIэ, культурэ бай зиIэ Адыгеим Iофышхо ешIэ. Лъэпкъ мэкъэмэ дахэхэм творческэ купхэм япрограммэ зэмылIэужыгъоу агъэпсы. Ныбжьым емылъытыгъэу, культурнэ Iофтхьабзэхэм гухахъо хагъуатэу цIыфмэ защагъэпсэфы. Культурэм хэхъоныгъэ ышIынымкIэ мыщ фэдэ Iофтхьабзэхэм яшIуагъэ къэкIощт.
НэкIубгъор зыгъэхьазырыгъэр
Лъэпшъыкъо Фатим.