Я 227-рэ Таллинскэ Красно­знамен­нэ артиллерийскэ бригадэу Адыгеим щыIэм «гвардейскэ» цIэмрэ гвардей­скэ лентэмрэ етыжьыгъэнхэм фэгъэ­хьыгъэ игъэкIотыгъэ Iофтхьабзэ щыIагъ.

Ащ хэлэжьагъэх Адыгеим и ЛIышъхьэу КъумпIыл Мурат, Урысыем и ЛIыхъужъэу, АР-м и Къэралыгъо Совет — Хасэм и Тхьаматэ игуадзэу Цэй Эдуард, Къыблэ дзэ шъолъырым ракетыдзэхэмкIэ ыкIи артиллериемкIэ ипащэ ипшъэрылъхэр пIалъэкIэ зыгъэцакIэу Алексей Сухорученкэр, я 227-рэ ар-
тиллерийскэ бригадэм икомандир ипшъэрылъхэр пIалъэкIэ зыгъэ­цакIэу Алексей Коси­новыр, дзэ частым хэтхэр, дзэ къулыкъушIэхэм яIахьылхэр, юн­армейцэхэр.
Урысыем и Президентэу Владимир Путиным 2025-рэ илъэсым бэдзэогъум и 21-м къыдигъэкIыгъэ Указым тетэу Хэгъэгум икъэухъумэнкIэ лIыгъэшхорэ псэемыблэжьныгъэ инрэ зэрэзэрихьагъэм фэшI я 227-рэ артиллерийскэ бригадэм «гвардейскэ» цIэр къыфагъэшъошагъ.

Урысые Федерацием и Къэралыгъо Быракърэ дзэ частым ибыракърэ пчэгум къызэрэрахьагъэмкIэ Iофтхьабзэр ра­гъэжьагъ. Бригадэм хэтхэр хэгъэгум и Президент и Указ нэIуасэ зыфашIыхэ нэуж щытхъуцIэмрэ гвардейскэ лентэмрэ ащ етыжьыгъэнхэм фытегъэпсыхьэгъэ Iофтхьабзэр рагъэжьагъ.
Къыблэ дзэ шъолъырым ракеты-­дзэ­хэмкIэ ыкIи артиллериемкIэ ипащэ ипшъэ­рылъхэр пIалъэкIэ зыгъэцакIэрэр щытхъуцIэ лъапIэр къызэрэфагъэшъошагъэмкIэ подразделением къыфэгушIуагъ, бригадэм ипащэхэми, идзэкIолIхэми япшъэрылъхэм ягъэцэкIэнкIэ тапэкIи гъэхъагъэхэр ашIынэу къафэлъэIуагъ.

«Бригадэм къытефэу «гвардейскэ» цIэр къыфаусыгъ. Хэгъэгуми, ащ и УIэшыгъэ КIуачIэхэми япащэхэм, Къыблэ дзэ шъолъырым ипащэхэм осэшхо къы­фашIыгъ бригадэм хэтхэм хэушъхьафыкIыгъэ дзэ операцием лIыгъэу, псэемыблэжьыныгъэу щызэрахьагъэм. Апэрэ мафэхэм къащегъэжьагъэу анахь лъэны­къо хьылъэхэм ащыщым Украинэм ина­цистхэр щыгъэкIодыгъэнхэмкIэ ипшъэ­рылъ гъэхъагъэ хэлъэу ащ егъэцакIэ», — къыIуагъ Алексей Сухорученкэм.

Iофтхьабзэм хэлажьэхэрэм апашъхьэ къыщыгущыIэзэ, Адыгеим и ЛIышъхьэ къыхигъэщыгъ «гвардейскэ» цIэ лъапIэр къатефэу бригадэм идзэкIолIхэм къа­зэрафаусыгъэр.
Республикэм и ЛIышъхьэ зэрэхигъэу­нэфыкIыгъэмкIэ, 1943-рэ илъэсым зэхащэгъэгъэ бригадэм хэтыгъэ дзэкIолI миным ехъумэ Хэгъэгу зэошхом иорден, Щытхъум иорден, Александр Невскэм иорден ыкIи нэмыкI тын лъапIэхэр къа­фагъэшъошагъэх. БлэкIыгъэ лIэшIэгъум ия 90-рэ илъэсхэм дзэ къулыкъушIэхэр Чэчэным щыкIогъэ заохэм ахэлэжьа­гъэх.

«Я 49-рэ дзэм хахьэу 2016-рэ илъэсым икIэрыкIэу зэхащэжьыгъэ я 227-рэ артиллерийскэ бригадэм итарихъ нэкIубгъуакIэхэр хетхэх. ТичIыпIэгъухэр бэу зэрэшъухэтым, бригадэм игъогу пытэу республикэм зэрепхыгъэм тарэгушхо», — къыIуагъ КъумпIыл Мурат.
Хэгъэгум иухъумакIо и Илъэс, ТекIоныгъэшхом ия 80-рэ илъэс мыщ фэдэ Iофтхьабзэр зэрэкIорэм мэхьанэшхо зэриIэр Адыгеим и ЛIышъхьэ хигъэунэфыкIыгъ. Апэрэ мафэхэм къащегъэжьагъэу хэушъхьафыкIыгъэ дзэ операцием хэлэжэрэ артбригадэм хэт дзэкIолI ми­ным ехъумэ къэралыгъо тын лъапIэхэр къазэрэфагъэшъошагъэр КъумпIыл Мурат шъхьафэу къыхигъэщыгъ.

«Советскэ Союзым и ЛIыхъужъэу Андырхъое Хъусен ыцIэ зыхьырэ артиллерийскэ дивизионыр бригадэм хэтэу зэрэзаорэм республикэр лъэшэу рэгу­шхо. ТичIыпIэгъухэм ятэжъхэм хэбзэ шIагъоу ахэлъыгъэр лъагъэкIуатэ, гъэ­хъагъэ хэлъэу япшъэрылъ агъэцакIэ», — къыIуагъ Адыгеим и ЛIышъхьэ.
Я 227-рэ артиллерийскэ бригадэм ипащэхэми, идзэкIолIхэми щытхъуцIэ лъапIэр къазэрафагъэшъошагъэмкIэ афэгушIуи, республикэм и ЛIышъхьэ дзэкIолI-гвардейцэхэм псауныгъэ пытэ яIэнэу, япшъэрылъхэм ягъэцэкIэнкIэ гъэхъагъэхэр тапэкIи ашIынэу, текIоныгъэр къыдахынышъ, шIэхэу ядэжь агъэ­зэжьынэу афэлъэIуагъ.
Джащ фэдэу Iофтхьабзэм къыщыгущыIагъэх АР-м и Къэралыгъо Совет — Хасэм и Тхьаматэ игуадзэу Цэй Эдуард, Къыблэ дзэ шъолъырым иинспекторэу Юрий Колягиныр, АР-м иветеранхэм я Совет итхьаматэу Къуаджэ Аслъан ыкIи нэмыкIхэр.
Нэужым гъэхъэгъэшхохэр зышIыгъэ дзэ къулыкъушIэхэм Жуковым, Суворовым ямедальхэр ыкIи нэмыкI тын лъапIэхэр аратыжьыгъэх.
Iофтхьабзэм къекIолIагъэхэр мэфэкI маршым, дзэ Iашэхэм якъэгъэлъэгъон, концертэу къафатыгъэм яплъыгъэх, дзэкIолIхэм япIастэ зыIуагъэфагъ.