БлэкIыгъэ зыгъэпсэ­фыгъо мафэхэм Къэрэщэе-Черкесым мэфэ­кIитIу щыхагъэунэфыкIыгъ — республикэм ­и Мафэрэ къалэу Черкесскэ загъэпсыгъэр илъэс 200 зэрэхъугъэмрэ.

Аужырэ хъугъэ-шIагъэм ихэгъэунэфыкIын фэгъэхьыгъэ Указым УФ-м и Пре­зидентэу Владимир Путиныр кIэтхэжьыгъ.
КъЧР-м имэфэкIхэр гъу­нэгъу шъолъырхэм дагощыгъ. АР-м и ЛIышъхьэу КъумпIыл Мурат Iофтхьа-
бзэ­хэм ахэлэжьагъ. Адыгеим икIы­гъэ лIыкIо купым хэтыгъэх сенаторэу Алек­сандр Наролиныр, УФ-м и Къэралыгъо Думэ идепутатэу Хьасанэкъо Мурат, Мыекъуапэ иадми­нист­рацие ипащэу Геннадий Мит­рофановыр.

Адыгеим ыкIи Къэрэщэе-Черкесым япащэхэм IофшIэгъу зэIукIэгъу зэдыряIагъ. Экономикэм, гъэсэныгъэм, шIэныгъэм, культурэм ыкIи патриотизмагъэ ахэлъэу ныбжьыкIэхэр пIугъэнхэм афэгъэхьыгъэ лъэныкъохэмкIэ шъолъырхэр зэрэзэдэлэжьэщтхэм КъумпIыл Муратрэ Рашид Темрезовымрэ атегущыIа­гъэх. Зэдэлэжьэныгъэм зеу­шъомбгъу, зэдаштэгъэ проектхэр агъэцакIэх, шIэныгъэу аIэкIэлъымкIэ зэхъожьых. Зэкъошныгъэмрэ гъунэгъу зэфыщытыкIэ дэгъумрэ тапэкIи шъолъырхэм зэрэлъагъэкIотэщтхэм яцыхьэ зэ­рэтелъыр шъолъырхэм япащэхэм хагъэунэфыкIыгъ.
Республикэхэм язэпхы­ныгъэ агъэпытэным иIахьы­шхо зэрэхилъхьэрэм пае АР-м итын анахь лъапIэу «Адыгеим и Щытхъузехьэр» КъумпIыл Мурат КъЧР-м и ЛIышъхьэ фигъэшъошагъ.
— Мы тыныр зэкъош зэфыщытыкIэу тиреспубликэхэм азыфагу илъым, лъы­тэныгъэ зэрэзэфэтшIырэм ыкIи тызэ­рэзэготым ятамыгъ. Къош шъолъырым ипащэ ащ фэдэу сыкъызэрэхигъэщы­гъэмкIэ сыфэраз. Къэрэщэе-Черкесымрэ Адыгеимрэ язэдэлэжьэныгъэ тапэкIи лъыдгъэкIотэщт ыкIи нахь пытэ хъущт, — къызэфихьысыжьыгъ Рашид Темрезовым.
МэфэкI Iофтхьабзэхэр Черкесскэ иста­дионэу «Нартым» щыкIуагъэх. Къум­пIыл Мурат къош республикэм щыпсэу­хэрэм афэгушIуагъ, тапэкIи хэхъоны­гъэхэр ашIынхэу афиIуагъ.
Черкесскэ загъэпсыгъэр илъэс 200 зэрэхъугъэр тарихъ хъугъэ-шIагъэу зэ­рэщытыр КъумпIыл Мурат хигъэунэ­фыкIыгъ. Шъолъырым игъэпсын, изэтеуцон, ихахъохэр Темыр Кавказым ыкIи Урысыем зэрэщытэу ятарихъ нэкIубгъо дахэхэм зэрахэтыр къыкIигъэтхыгъ.

— Черкесскэ ыкIи республикэм щы­псэухэрэр якъалэ, ащ ицIыфхэу зэ­гу­рыIоныгъэмрэ мамырныгъэмрэ ары­гъуазэхэзэ яIофшIэнкIэ шъолъырым исо­­циальнэ-экономическэ кIуачIэ зэ­тезгъэуцуагъэхэм ыкIи хэзгъэхъуагъэхэм арыгушхонхэ алъэкIыщтых. Черкесскэ хигъэунэфыкIыгъэ мэфэкIыр къалэм ыкIи республикэм тапэкIи хэхъоныгъэшIухэр ашIынхэмкIэ яIэубытыпэшIу орэхъу. Мы шъолъыр дахэм щыпсэурэ цIыф лъэпкъ­хэр тапэкIи мамырэу, лъытэныгъэ зэфа­шIыжьэу щэрэпсэух, — къыIуагъ Къум­пIыл Мурат.
ИгущыIэ икIэух Адыгеим и ЛIышъхьэ къош Къэрэщэе-Черкесым щыпсэухэрэм псауныгъэ пытэрэ щыIэкIэшIурэ яIэнэу, яреспубликэ гупсэ ыкIи Урысые Федерацием зэрэщытэу хэхъоныгъэхэр язгъэшIыщт лъэныкъуакIэхэр къадэ­хъунхэу афиIуагъ.
МэфэкI Iофтхьабзэхэм ахэтэу хэу­шъхьафыкIыгъэ дзэ операцием илIы­хъужъхэм ясаугъэт зыщагъэуцущт чIыпIэм щагъэтIылъыгъэ мыжъор ТекIоныгъэм и Паркэу Черкесскэ дэтым къыщызэIуахыгъ. Хэгъэгу зэошхом хэкIо­дагъэхэм яшIэжь агъэлъапIэу саугъэт зэхэтхэм къэгъагъэхэр акIэралъхьагъэх.
Джащ фэдэу Черкесскэ илъэс 200 зэрэхъугъэм фэгъэхьыгъэ проспектыр къызэIуахыгъ. Пчъагъэр зытетхэгъэ стелэр къалэм итемыр лъэныкъорэ федеральнэ гъогумрэ зэзыпхырэ автомобиль гъогум тырагъэуцуагъ.
МэфэкIым ехъулIэу мэкъумэщым ыкIи къыдэгъэкIыжьын промышленностым Къэрэщэе-Черкесым гъэхъагъэу щишIыгъэхэм якъэгъэлъэгъон Черкесскэ щыкIуагъ. Пхъэшъхьэ-мышъхьэхэм, хэтэ­рыкIхэм, фермерхэм Iуахыжьыгъэ лэ­жьыгъэхэм, гъомылапхъэхэм къэгъэлъэ­гъоныр къагъэбаигъ.
«Сэнаущыгъэ зыхэлъхэм яермэлыкъи» къалэм имэфэкI мафэ къыгъэдэхагъ. «Уцышъо псыгъэхъунэр» зыфиIорэ паркым КъЧР-м щыпсэурэ лъэпкъ зэфэ­шъхьафхэм ящагу-хьакIэщхэр щагъэ­псыгъэх. Лъэпкъ пэпчъ шэн-хабзэу хэлъ­хэр ащ къыщагъэлъэгъуагъ. СурэтышI ныбжьыкIэ IэпэIасэхэм яIэшIа­гъэхэм якъэгъэлъэгъонхэм Черкесскэ иурамхэр къагъэдэхагъэх.
Шыгъэчъэ зэнэкъокъухэри зэхэщэ­гъа­гъэх. Ставрополь краим, Темыр Осе­тием къарыкIыгъэ спортсменхэр ахэм ахэлэжьагъэх.
«Узынчъагъэм имарш» зыфиIорэ Iоф­тхьабзэм Черкесскэ щыпсэурэ нэбгырэ мини 5-м фэдиз ягуапэу хэлэжьа­гъэх. Олимпийскэ джэгунхэм тIогъогогъо ячемпионэу Роман Власовыр ащ къе­кIолIагъ. Ны-тыхэмрэ ясабыйхэмрэ, ве­теранхэмрэ пенсионерхэмрэ, зипсау­ныгъэкIэ щыкIагъэхэр зиIэхэр маршым хэтхэу къыщызэдэкIуагъэх.
Адыгеим къыщежьагъэу «Темыр Кавказым ицIыф лъэпкъхэм язэкъош­ныгъ» зыфиIорэ кушъхьэфэчъэ зэнэ­къокъум изичэзыу едзыгъо мэфэкIым тефэу Черкесскэ къынэсыгъ. Ащ хэлэжьэрэ спортсмени 120-рэ КъЧР-м игъогухэм арычъагъэх.