Iоныгъом и 8-р — Урысыем илъэпкъыбзэхэм я Маф. УФ-м и Президентэу Владимир Путиным иунашъокIэ мыгъэ къыщегъэжьагъэу мэфэкIыр хэтэгъэунэфыкIы. Усэ­кIо цIэрыIоу Расул Гамзатовыр къызыхъугъэ мафэм ар тырагъэфагъ.

Къэралыгъом ипащэ къыхигъэщыгъ: «Къэрэухэр» зыфиIорэ тхыгъэм иавтор цIэрыIо ныдэлъфыбзитIу иIэу ылъытэщтыгъ: аварыбзэмрэ зэрытхэщтыгъэ ыкIи дунаим зэрэщызэлъашIэгъэ урысы­бзэмрэ». Къэбарыр ихъытыу нэкIубгъо­хэм къащитыгъ ыкIи мэфэкIымкIэ рес­публикэм щыпсэухэрэм къафэгушIуагъ АР-м и ЛIышъхьэу КъумпIыл Мурат.
МэфэкIым ипшъэрылъыр къэралыгъом илъэпкъ зэмылIэужыныгъэ, шъхьадж ишэн-хабзэхэр, иныдэлъфыбзэ, икультурэ къэухъумэгъэнхэр ары. Мы лъэныкъомкIэ Адыгеим Iофышхо щагъэцакIэ. Лъэп­къыбзэмрэ культурэмрэ мэхьанэу ари­тырэмкIэ республикэр сыдигъуи щысэтехыпI. Урысыбзэми адыгабзэми якъэу­хъумэнкIэ ыкIи хахъо ягъэшIыгъэнымкIэ, ахэр зэрагъэшIэным фэгъэблэгъэнхэмкIэ шъолъыр зэнэкъокъухэр, лекциехэр, усакIохэм, тхакIохэм, шIэныгъэлэжьхэм ятворческэ зэIукIэхэр щызэхащэх. Ащ дакIоу кIэлэегъаджэхэм IэпыIэгъоу арагъэгъотырэм щыхагъахъо. 2022-рэ илъэ­сым къыщегъэжьагъэу «Ныдэлъфыбзэмрэ литературэмрэкIэ кIэлэегъэджэ анахь дэгъу» зыфиIорэ зэнэкъокъур респуб­ликэм щырекIокIы. Гуманитар ушэтынхэмкIэ Адыгэ республикэ институтэу КIэрэщэ Тембот ыцIэкIэ щытым щызэхэщэгъэ Проектнэ офисыр кIэлэцIыкIухэм бзитIур ашIэу пIугъэнхэм ыкIи егъэджэгъэнхэм дэлажьэ.
«КIэнышхоу щыт ныдэлъфыбзэу атэжъ пIашъэхэм абзэрэ урысыбзэу зэкIэми тызэзыпхырэмрэ лIэужыкIэ пэпчъ ашIэныр ыкIи арыгущыIэнхэр пшъэрылъ шъхьаI. Мы лъэныкъомкIэ шIуагъэ къэзытырэ проектхэм язэгъэшIэнрэ яIоф­шIэнрэ кIэлэцIыкIу IыгъыпIэхэм ыкIи еджапIэхэм ащылъыдгъэкIотэщт, сыда пIомэ бзэр гущыIэн амал къодыеп, ар лъэпкъым ыпс, итарихъ, инеущырэ маф. Урысыем илъэпкъхэм абзэрэ якультурэрэ хахъо ягъэшIыгъэным мэфэкIыкIэр зэрэфэIорышIэщтым сицыхьэ телъ, — къытхыгъ АР-м и ЛIышъхьэ.