Мы мафэхэм республикэ ипподромым шыгъачъэ щы­кIуагъ.

Мыекъуапэ щыпсэухэрэр ыкIи къалэм ихьакIэхэр Iофтхьабзэм зэрищэлIагъэх, ашIогъэшIэгъонэу ащ еплъыгъэх. ЛъэныкъуихкIэ зэнэкъокъухэр рекIокIыгъэх. Мыщ изэхэщакIор Адыгеим физическэ культурэмкIэ ыкIи спортымкIэ и Комитет ары.
Тишъолъыр исхэм ямызакъоу, нэ­мыкI чIыпIэхэм къарыкIыгъэхэри шыгъачъэм къекIолIагъэх. ГущыIэм пае, Магадан щыпсэурэ сурэттехэу Юрий Тимофеевыр спорт мэфэкIым къеблэгъагъ, ылъэгъугъэр шIогъэшIэгъоныгъ, сурэтыби тырихыгъ.
Зэфэхьысыжьхэм къызэрагъэлъэгъуа­гъэмкIэ, Эдуард Мордухович ишэу Бармалей, Юрий Краснокутскэм ишхэу Графиня ыкIи Княгиня, Дзыбэ Джэнэт ишэу Мэзнэф, Кубэщыч Анзор ишхэу Амина Голд ыкIи Хьатыгъужъыкъуай мы зэнэкъокъум апэрэ чIыпIэр щау­бытыгъ. ТекIоныгъэр къыдэзыхыгъэхэм кубокхэр ыкIи дипломхэр афагъэшъошагъэх.
Шыгъачъэм дакIоу, мэфэкIым къеблэгъагъэхэр Адыгэ Республикэм итвор­ческэ купхэм ыкIи иартистхэм къагъэ­хьазырыгъэ концертым еплъынхэ амал яIагъ. Джащ фэдэу мэфэ реным ыпкIэ хымылъэу щэламым, адыгэ къуаер зыдэлъ хьалыжъом, нэмыкIхэм яIэшIугъэ ауплъэкIун алъэкIыгъ. Мы шIушIэ Iоф­тхьабзэр зэхэзыщагъэр Адыгеим изаслуженнэ артистэу Дзыбэ Мыхьамэт. Ащ цIыфэу къэзэрэугъоигъэхэм орэд заулэ къафиIуагъ.
Александра Балабась.