Урысыем щыпсэурэ лъэпкъхэм культурэмрэ спортымрэкIэ яя XVI-рэ фестивалэу Севастополь щыкIуагъэм Адыгеим илIыкIо куп хэлэжьагъ. АР-м иартистхэм, иIэпэIасэхэм ыкIи испортсменхэм ащ зыкъыщагъэлъэгъуагъ.

Физическэ культурэм, спортым ныбжьыкIэхэр пыщэгъэнхэр, творчествэм ылъэныкъокIэ сэнаущыгъэ зыхэлъхэр къыхэгъэщы­гъэнхэр ары зэхэщакIохэм пшъэрылъэу зыфагъэуцу­жьырэр.
«Урысыер — лъэпкъыбэ зыщыпсэурэ къэра­лыгъу. Мы Iофтхьабзэр зытегъэпсыхьагъэр шъо­лъыр­хэм язэпхыныгъэ гъэ­пытэгъэныр, культурэмкIэ гъэхъагъэу яIэхэмкIэ зэ­хъожьынхэр, щыIэкIэ-псэу­кIэ тэрэзым цIыфхэр ры­гъозэнхэм тегъэгушхогъэнхэр ары. Тиреспуб­ликэ культурэ баеу иIэм, тихабзэхэм мыщ нэIуасэ щафэтэшIых, лъэпкъ шъуа­шэхэр, сурэтхэр, адыгэхэм ядышъэ идэкIэ гъэкIэрэ­кIэгъэ пкъыгъохэр ятэгъэ­лъэгъух. Iофтхьабзэм къе­блэгъагъэхэм ащыщ Севастополь игубернато­рэу Михаил Развожаевыр» — къащитхыгъ социальнэ хъытыухэм Адыгэ Рес­публикэм и ЛIышъхьэу КъумпIыл Мурат.

Къыблэ федеральнэ шъолъырым, Донецкэ ыкIи Луганскэ народнэ респуб­ликэхэм, Херсонскэ ыкIи Запорожскэ хэкухэм ялIыкIохэр фестивалым хэлэ­жьагъэх, зэкIэмкIи нэбгырэ 1500-м ехъу.
Непэ тизыкIыныгъэ зы­гъэпытэхэрэм ащыщ ­лъэпкъ культурэ зэфэшъхьафхэр, ахэм ябаиныгъэ, яхэушъхьафыкIыгъэ. Лъэпкъ шэн-хабзэхэм якъэухъумэн мыщ фэдэ фестивальхэр фэIорышIэх.
АР-м и Къэралыгъо ансамблэу «Ислъамыер» Iофтхьабзэр къызэIузы­хыгъэмэ ахэтыгъ. Адыгэ лъэпкъ орэдымрэ къа­шъом­рэ купым ипрограммэ зэрэзэдыхэтхэр цIыф­хэм лъэшэу агу ри­хьыгъ.
АР-м лъэпкъ культурэмкIэ и Гупчэ, Адыгеим иIэпэIасэхэм ыкIи лъэпкъ IэпэщысэшIыным пылъхэм я Ассоциацие, спортсменхэр Iофтхьабзэм хэлэжьагъэх. Лъэпкъ творческэ купхэм яфорумэу «ЦIыф лъэпкъыбэ зыщыпсэурэ Урысыер» зыфиIорэм тиреспубликэ къыщыгъэлъэгъуагъэ хъугъэ. Театрэ­хэм, творческэ купхэм, ансамблэхэм яIофшIэн зэ­рэзэхащэхэрэм ащ щытегущыIагъэх.
Адыгеим ихэшыпыкIыгъэ командэ хэт спорт­сменхэм самбэмкIэ, шъэ­жъыем идзынкIэ, щэ-
бзэ щэрыонымкIэ, фи­джитал-­баскетболымкIэ, нэмыкI­хэмкIэ ухьазыры-­ныгъэу яIэр къагъэлъэ­гъуагъ.
— БлэкIыгъэ илъэсым АР-м и Къэралыгъо академическэ ансамблэу «Налмэсым», мы илъэсым «Ислъамыем» фестивалым Адыгеир къыщагъэлъэгъуагъ. АР-м иIэпэIасэхэм яIэшIагъэхэм лъэпкъ нэшанэ зиIэ щагур къа­гъэдэхагъ. Тиспортсменхэм ухьазырыныгъэ дэгъу къагъэлъэгъуагъ, — къы­Iуагъ АР-м культурэмкIэ иминистрэ игуадзэу Кушъу Светланэ.