Темырым адыгэ шхынымэ IэшIур щыущт. Ненецкэ автоном хэкум икъалэу Нарьян-Мар шыкIощт фестивалэу «Тундра» зыфиIорэм адыгэ шхыныгъохэр хэлэжьэщтых.

Адыгеим илIыкIоу шхапIэу «Адыгэ Iанэм» ипащэу Теуцожь Бислъан ащ зыкъыщигъэлъэгъощт. Арырэ пщэрыхьэкIо нэбгыритIоу игъусэхэмрэ непэ гъогу техьэх.
— Фестивалыр зэхэзыщэхэрэм екIо­лIэкIэ гъэшIэгъон яI. Темырым щыпсэу­хэрэм ямызакъоу машIомрэ (къыблэр), мылымрэ (темырыр) зэпагъэуцунэу рахъухьагъ. ЛъэныкъуитIур зэшIогъэшIэ­гъон ашIыни, зэфагъэнэIосэнхэр, ащ ишIуагъэкIэ яшъолъыр ыцIэ агъэIуныр ахэм ямурад, — къыддэгощагъ Бислъан.

Теуцожьыр темыр фестивалым зэрэрагъэблэгъагъэр ошIэ-дэмышIагъэ фэ­хъугъ, ежэгъахэп. Адыгэ шхыныгъохэр ыгъэкъэбархэу зыхэлэжьэгъэгъэ къэралыгъо телекъэтыным къыщызышIагъэхэм ыцIэ къыраIуагъэу къычIэкIыгъ. ГъогумкIи, зэрысыщтхэмкIи, пщэрыхьанхэмкIэ ящыкIэгъэщтымкIи Iофтхьабзэм изэхэща­кIохэр IэпыIэгъу хъугъэх. Ежь Бислъан ылъэныкъокIэ ищыкIагъэр ащ кIоныр, адыгэ шхын IэшIухэр ышIынхэр ары.
— Бэрэ щытыупщэрыхьыщтым тегупшысагъ. ГурытымкIэ зэшхэгъу 700 фэдизыр дгъэхьазырын фае. Щыпсыр щытшIыныр тIэкIу къиныщтэу тлъытагъэ. Арыти, нэкулъым тыкъыщыуцугъ. Ащ фэдэ зыми зэримыупщэрыхьыщтым тицыхьэ телъ. Iо хэмылъэу хьалыжъохэр дгъэжъэщтых. Щэламэхэр хьалыгъум ычIыпIэщт: гъэIэшIугъэуи щыугъэуи. Мастер-классхэми къакIэлъэIугъэхэшъ, ащ къыдыхэлъытагъэу къояжъэ тшIыщт. А пстэум яшIыкIэ зэрытыщт тхылъ цIыкIухэр дгъэхьазырыгъэх. Джащ фэдэу адыгэ къуае зыдэтщэнэу лъэшэу къыкIэ­лъэIугъэх, — еIо Бислъан.
Фестивалыр зы мафэрэ кIощт, ау гъогу зэпыдзэм тхьамафэр ыхьыщт. Iоныгъом и 15-хэм адэжь Адыгеим илIыкIо куп къэкIожьыщт.
Анцокъо Ирин.