Адыгеим икъоджэ псэупIэхэм адэт еджапIэхэм ащыщхэм апэрэ мэкъумэщ классхэр къащызэIуахыгъэх.

Ахэм мы лъэныкъомкIэ шIэныгъэ куухэр ащарагъэгъотыщт, кIэлэцIыкIухэр сэнэхьатэу къыхахыщтым ащыфагъэ­хьазырыщт.
Федеральнэ программэу «Мэкъумэщ хъызмэтым иIофышIэхэр» зыфиIорэм къыдыхэлъытагъэу мы проектыр рахьы­жьагъ, ащ ипхырыщын мэкъумэщ хъыз­мэтшIэпIэ инхэр, чIыпIэ зыгъэIорышIэ­жьыпIэ къулыкъухэр хэлажьэх.
«КIэлэцIыкIухэм еджапIэм зыщычIэ­хьагъэхэм къыщыублагъэу сэнэхьатэу къыхахыщтымкIэ IэпыIэгъу тафэхъуныр, гурыт ыкIи апшъэрэ гъэсэныгъэ яIэу, республикэм имэкъумэщ хъызмэт Iоф­шIэпIэ чIыпIэхэр щызэрагъэгъотыфэхэкIэ тынаIэ атетыныр ары пшъэрылъ шъхьаIэу тиIэр. Мы илъэсым Адыгеим иеджэпIи 7-мэ класси 8 ащыдгъэпсын тыгу хэлъ. «Биотехнология и пищевое производство», «Эффективное животноводство и современные корма», «Агротехно­логия», «Генетика и селекция растений» зыфиIорэ сэнэхьатхэм ахэр афагъэхьазырыщтых. Ащ федеральнэ ахъщэу сомэ миллиони 6,4-рэ фэдиз пэIудгъэхьащт, инвесторхэри къыхэдгъэлэжьэщтых», — къыщитхыгъ АР-м и ЛIышъхьэу КъумпIыл Мурат социальнэ нэкIуб­гъохэм ащыщ.
Республикэм ипащэ къызэрэхигъэщыгъэмкIэ, субсидиехэр къыздэлъытэгъэ проектым хэмытэу поселкэу Инэм игурыт еджапIэу N 2-м «Цветоводство» сэнэхьатым зыщыфагъэхьазырыщтхэ мэкъумэщ класс щагъэпсыщт. Мы лъэныкъом къэралыгъо IэпыIэгъу егъэгъотыгъэным фытегъэпсыхьэгъэ програм­мэхэр къызфагъэфедэзэ, специалист ныбжьыкIэхэр къыхагъэлажьэхэзэ пхы­ращынэу ары гухэлъэу яIэр.
«НыбжьыкIэхэм къуаджэу, поселкэу къызщыхъугъэхэм IофшIэпIэ чIыпIэхэр ащызэрагъэгъотышъунэу, зэрифэшъуа­шэм тетэу ахъщэ къалэжьынэу, унагъо ашIэнэу, сабыйхэр апIунхэу ары тызыфаер», — къытхыгъ КъумпIыл Мурат.