Пыдзэфэ пытэхэм апае кубометрэ 1,1-рэ зэрыфэрэ контейнери 110-рэ Адыгеим джырэблагъэ къащагъ.

ЦIыфхэм хэкIэу къырахырэр зэра­хьылIэрэ чIыпIэхэм кубометрэ 0,75-м телъытагъэу атетхэм ачIыпIэ ахэр агъэуцущтых. Ащ пыдзафэхэм ядэщын нахь къыгъэпсынкIэщт. Джащ фэдэу фыкъуагъэ зыфэхъугъэ бакхэри зэбла­хъущтых.
Шъолъыр операторым шъугу къегъэ­кIыжьы, кубометрэ 1,1-рэ зэрыфэрэ контейнерхэр пыдзэфэ пытэхэм апай зыкIагъэуцухэрэр. Ахэм ахэхьэх гъомылапхъэхэм къапыкIыгъэхэр, къэмланыжъхэр, пластикым, тхылъыпIэм, шэкIым ахэшIыкIыгъэ пкъыгъохэр.
Мы контейнерхэм псэолъэшIыным къыпыкIыгъэхэр, ятIэр, мыжъор, нэ­мыкI пкъыгъо онтэгъухэр арышъулъхьэ хъущтэп. Ахэм бакхэр агъэфыкъох, техни­кэу хэкIыр Iузыщырэм пэрыохъу фэхъух.
Джащ фэдэу медицинэ пыдзафэхэр, батарейкэхэр, лампэхэр, ныкъост хъу­гъэу, джыри мыкIосэжьыгъэ пкъыгъохэр арышъулъхьан шъуфитэп. Унэгъо IапIэхэр, гущыIэм пае, «бытовойкIэ» заджэхэрэ техникэр, пIэкIорхэр, диванхэр, нэмыкI псэуалъэхэр хэушъхьафыкIыгъэу гъэпсыгъэ площадкэм ешъухьылIэнхэ фае.
Мы шапхъэхэр жъугъэцакIэхэмэ, контейнерхэр нахьыбэрэ мыфыкъохэу щытыщтых, щагухэм къэбзэныгъэр адэ­лъыщт. Площадкэхэм язытет, хэкIыр дэзыщырэ транспортым екIолIапIэ иIэмэ зынаIэ тетын, къэбзэныгъэм лъыплъэн фаер гъэIорышIэкIо компаниехэр ары.
«ЭкоЦентрэм» и Адыгэ шъолъыр къутамэ ипресс-къулыкъу.