Хьапс тыралъхьагъ
Къыблэ шъолъыр дзэ хьыкумым Гурыт Азием къыщыхъугъэу илъэс 26-рэ зыныбжь хъулъфыгъэм иуголовнэ IофкIэ унэшъо гъэнэфагъэ ыштагъ. Урысыем и Уголовнэ кодекс ия 205.5-рэ статья ия 2-рэ Iахь, ия 205.1-рэ статья иа 1.1-рэ Iахь зигугъу къашIырэ бзэджэшIагъэхэр зэрихьагъэкIэ, террористическэ организацием иIофшIэн хэлэжьагъэкIэ ыкIи нэбгыракIэхэр ащ зэрэхищэщтыгъэмкIэ ар агъэмысагъ.
Урысыем щынэгъончъэнымкIэ и Федеральнэ къулыкъу Адыгэ РеспубликэмкIэ и ГъэIорышIапIэ иIофышIэхэм зэрагъэунэфыгъэмкIэ, радикальнэ ислъамым дезыгъаштэщтыгъэ, дунэе террористическэ организациеу Урысыем щызэхащэн фимытым иIофшIэн хэлажьэщтыгъэ хъулъфыгъэр Мыекъуапэ щыщ пшъэшъэжъыехэу зыныбжь имыкъугъэхэм террористиическэ организацием хищэнхэм пае 2023-рэ илъэсым къыщегъэжьагъэу пчъагъэрэ мессенджеркIэ адэгущыIагъ.
Урысыем и Уголовнэ кодекс ия 134-рэ статья иа 1-рэ Iахь диштэу хъулъфыгъэм ыужкIэ къыфызэIуахыгъэгъэ уголовнэ Iофыр зэхафы, бзэджашIэхэм пшъэдэкIыжь ягъэхьыгъэнымкIэ Федеральнэ къулыкъум Адыгэ РеспубликэмкIэ и ГъэIорышIапIэ иколоние къепхыгъэ следственнэ изоляторым исы зэхъуми, террористическэ организацием хэтхэр тэрэзэу зекIохэу ащ ылъытэщтыгъ, террористическэ актхэм ахэлэжьэнхэу къыдисхэм къяджэщтыгъ.
Уголовнэ Iофыр къызэIузыхыгъэр ыкIи зэхэзыфыгъэр Урысыем и Следственнэ комитет Адыгэ РеспубликэмкIэ иследственнэ гъэIорышIапI ары.
Урысыем и Уголовнэ кодекс ия 205.5-рэ статья ия 2-рэ Iахь, ия 205.1-рэ статья иа 1.1-рэ Iахь адиштэу Къыблэ шъолъыр дзэ хьыкумым илъэс 18-рэ мэзихрэ хьапс бзэджашIэм тырилъхьагъ. Хьыкумым иунашъо джыри хэбзэ кIуачIэ иIэп.