Адыгеим щыпсэурэ хъулъфыгъэу илъэс 23-рэ зыныбжьым еплъыкIэу къыриIотыкIыхэрэм афэсакъынэу щынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм фагъэпытагъ.

Ахэм зэрагъэунэфыгъэмкIэ, хъулъфыгъэм Украинэм иорганизациеу терроризмэм епхыгъэ бзэджэшIагъэхэр зэхэзыщэхэрэм зэрадыригъаштэрэр купэу зыхэтхэм шъхьэихыгъэу апашъхьэ къыщиIощтыгъ, УФ-м и УIэшыгъэ КIуачIэхэм хэушъхьафыкIыгъэ дзэ операциеу зэхащагъэм фэгъэхьыгъэ мыхъунэу интернет нэкIубгъо­хэм къащатхыхэрэм чанэу ахэлажьэщтыгъ.
Джащ фэдэу хъулъфыгъэр Польшэм кIожьынышъ, дунэе террористическэ организациеу УФ-м щызэхащэн фимытхэм ащыщым хэхьанэу, унашъоу къыфашIыхэрэр ыгъэцэкIэнхэу зэрэфаер къыриIотыкIыщтыгъ.