Хэгъэгу кIоцI IофхэмкIэ отделэу Тэхъутэмыкъое районым щыIэм идежурнэ къулыкъу мы чIыпIэм щыпсэурэ кIалэу илъэс 23-рэ зыныбжьым зыкъыфигъэзагъ ыкIи ежь ылъэныкъокIэ гъэпцIагъэ зыхэлъ бзэджэшIагъэ зэрэзэрахьагъэр зэрыт тхьаусыхэ тхылъ IэкIигъэхьагъ.

Ащ къызэриIотагъэмкIэ, мафэ горэм имынэIосэ цIыфыр телефонкIэ къыфытеуагъ ыкIи банкым иIофышIэу къыриIуагъ. КIалэм исчет илъ ахъщэм ылъэныкъокIэ гумэкIыгъо зэрэщыIэр ыкIи къыдэIэпыIэным пае смс-у къыфэкIуагъэм ит кодыр къыриIон фаеу къыгуригъэIуагъ.
Охътабэ темышIэу, кIалэм икIэрыкIэу къыфытеуагъэх ыкIи макъэ къырагъэ­Iугъ Интернетым щыриIэ аккаунтым хэбзэнчъэу ихьагъэхэу. Ащ къыхэкIкIэ кIалэм иахъщэ зэрылъ счетхэр мыщынэгъончъэхэу гурагъэIуагъ. Специалист нэпцIхэм къызэраIуагъэмкIэ, счетхэм арылъыр бзэджашIэхэм ратыгъукIынэу ыуж итых.
КIэлэ ныбжьыкIэм къыраIуагъэр зэкIэ ыгъэцэкIагъ. Иахъщэ цыхьэшIэгъу счетым регъахьэ шIошIызэ, ар шIуатыгъугъ. Зэрарыр сомэ миллиони 4-рэ мин 600-м кIэхьагъ.
Адыгэ Республикэм хэгъэгу кIоцI IофхэмкIэ и Министерствэ цIыфхэм за­къы­фегъазэ амышIэхэрэр телефонкIэ къафытеохэмэ, къаIорэр ашIошъ амыгъэхъунэу.
КъыжъудэгущыIэрэр шъуиахъщэ къырыгущыIэ хъумэ, смс-у къэкIуагъэм итхагъэр е кодыр епIонэу къыкIэлъэIумэ, ар зэрэгъэпцIакIор къыжъугурыIон фае.
Сакъыныгъэ къызхэжъугъафэмэ, шъуимылъку къэшъуухъумэщт. Сыд фэдэрэ Iофыгъуи нахь куоу шъухаплъ ыкIи псынкIэу, плъыр-стырым шъухэтэу шъумызекIу.