УФ-м и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновым дэжь щызэхэщэгъэ Советым изэхэсыгъо тыгъуасэ щыIагъ.

Видеоконференцие шIыкIэм тетэу кIогъэ Iофтхьабзэм хэлэжьагъэх УФ-м и Правительствэ илIыкIохэр, Къыблэ федеральнэ шъолъырым хэхьэрэ субъект­хэм япащэхэр. Адыгеим ыцIэкIэ ащ хэлэжьагъэх республикэм и ЛIышъхьэу КъумпIыл Мурат, федеральнэ инспектор шъхьаIэу Сергей Дрокиныр, АР-м иминистрэхэм я Кабинет и Тхьаматэу КIэрэщэ Анзаур, министрэхэм я Кабинет и Тхьаматэ игуадзэу, финансхэмкIэ министрэу Виктор Орловыр, псауны­гъэр къэухъумэгъэ­нымкIэ министрэу Мэрэтыкъо Рустем, гъэсэныгъэмрэ шIэныгъэм­рэкIэ министрэу Евгений Лебедевыр.
Зэхэсыгъом къыщаIэтыгъэхэм ащыщ лъэпкъ проектэу «ГъэшIэ кIыхьэр ыкIи чаныр» зыфиIорэм ифедеральнэ проектэу «Медицинэ картэхэр» Къыблэ фе­деральнэ шъолъырым зэрэщагъэцакIэрэм иIофыгъо. Владимир Устиновым зэхэсыгъом хэлажьэхэрэм агу къыгъэ­кIыжьыгъ Владимир Путиным и Указ щыгъэнэфэгъэ пшъэрылъхэм ягъэцэкIэн мэхьанэшхо зэриIэр. Ащ пае мы илъэсым къыщегъэжьагъэу лъэпкъ проектыкIэхэр хэгъэ­гум щагъэцакIэхэу аублагъ. Къыблэ федеральнэ шъолъырым хэхьэрэ субъект­хэм яучреждениехэу псауныгъэм икъэу­хъумэн фэгъэзагъэхэм а специалистхэр нахьыбэу аIухьанхэмкIэ ищыкIэгъэ амал­хэр зэрэзэрахьэхэрэр зэхэсыгъом къыщыхагъэщыгъ.

УФ-м псауныгъэр къэухъумэгъэнымкIэ иминистрэ игуадзэхэу Евгений Камкинымрэ Татьяна Семеновамрэ лъэпкъ проектхэм ягъэцэкIэнкIэ пшъэрылъхэр къагъэнэфагъэх. Къыблэ федеральнэ шъолъырым исубъект пэпчъ IофышIэхэмкIэ иIофхэм язытет шъхьафэу мыщ щызэхафыгъ. Федеральнэ проектэу «Медицинэ картэхэр» зыфиIорэм игъэцэ­кIэнкIэ Адыгеир пэрытныгъэ зыIыгъхэм зэращыщыр къыщаIуагъ. АР-м псауныгъэр къэухъумэгъэнымкIэ и Министерствэ пшъэрылъ къыфашIыгъ, псауныгъэм икъэухъумэн фэгъэзэгъэ учреждениехэр зыщыкIэрэ IофышIэхэр къафигъотынэу, медицинэ гъэсэныгъэм ипрограммэхэм атетэу целевой егъэджэным хэбзэ икъу хилъхьанэу.
Адыгеим и ЛIышъхьэ Урысыем и Президент, хэгъэгум и Правительствэ, УФ-м псауныгъэр къэухъумэгъэнымкIэ и Министерствэ «тхьашъуегъэпсэу» ариIуагъ IэпыIэгъушхо тиреспубликэ къызэрэратыгъэм фэшI. Ахэм яIэпыIэгъу ишIуагъэкIэ 2018-рэ илъэсым къыщегъэ­жьа­гъэу сымэджэщи 4, IэзэпIи 5, фельдшер-мамыку IэзэпIэ 33-рэ, амбулатории 3 Адыгеим къыщызэIуахыгъ. Мыгъэ джыри амбулатории 7-мэ яшIын аухыщт. Район гупчэ сымэджэщи, къэлэ IэзэпIи 4-мэ гъэцэкIэжьын IофшIэнхэр ара­шIылIэх.
«Псауныгъэм икъэухъумэн фэгъэзэгъэ псэолъакIэхэр къызэрэзэIуахырэм, джырэ шапхъэхэм адиштэрэ оборудованиер ахэм зэрачIагъэуцорэм IэпэIэсэныгъэ­шхо зыхэлъ специалистхэр нахь ящыкIагъэу къашIы. Лъэныкъо пстэури къыдэтлъытэзэ, мыщ фэдэ Iофыгъор зэшIотэхы. Мыгъэ щегъэжьагъэу дгъэцакIэу тыублэгъэ лъэпкъ проектэу «ГъэшIэ кIыхьэр ыкIи чаныр» зыфиIорэм ифедеральнэ проектэу «Медицинэ кадрэхэр» зыцIэм диштэу ар зэшIотэхы», — къыIуагъ КъумпIыл Мурат.
IофышIэхэм япхыгъэ Iофыгъом изэшIохынкIэ нэмыкI амалэу республикэм щагъэфедэхэрэми Адыгеим и ЛIышъхьэ ягугъу къышIыгъ.
Къэралыгъо программэхэу «Къоджэ доктор», «Къоджэ фельдшер» зыфиIо­хэрэр мыщкIэ амалышIоу щытых. Ахэр пхыращэу зырагъэжьагъэм къыщыублагъэу Адыгеим имедицинэ учреждениехэу къуаджэхэм Iоф ащызышIэхэрэм гурыт медицинэ IофышIи 104-рэ, врач 591-рэ, 2025-рэ илъэсым врач 16, гурыт медицинэ IофышIи 6 къаIухьагъ.
Федеральнэ мылъкум нэмыкIэу программэу «Къоджэ фельдшер» зыфиIорэм диштэу зэтыгъоу сомэ мин 500 араты, зыщыпсэущтхэ унэр бэджэндэу зыштэхэ­рэм мылъкоу пэIухьэрэр афалъэгъужьы, медицинэ IофышIэхэм псэупIэ-коммунальнэ хъызмэтым ифэIо-фашIэхэм уасэу алъатырэм къафырагъэгъэзэжьызэ, джащ фэдэу общественнэ транспортыр къызэрэзфагъэфедэрэм пае чIэнагъэу ашIыгъэр къафырагъэкъужьы.
Адыгеим и ЛIышъхьэ зэхэсыгъом къы­зэрэщыхигъэщыгъэмкIэ, апэрэ илъэсныкъом амалэу зэрахьагъэхэм яшIуагъэкIэ медицинэ IофышIэхэу республикэр зыфыщыкIэщтыгъэр нэбгыри 100-кIэ нахь макIэ хъугъэ, врачхэм нэбгыри 116-рэ, гурыт медицинэ IофышIэхэм нэбгыри 179-рэ къахэхъуагъ. ПстэумкIи респуб­ликэм имедицинэ учреждениехэм врач 1711-мэ, гурыт медицинэ IофышIэ 3607-мэ Iоф ащашIэ.
Лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэм къепхыгъэ федеральнэ проектэу «НахьышIоу щыIэр зэкIэ кIэлэцIыкIухэм апай» зыфиIорэр Къыблэ федеральнэ шъолъырым щыгъэ­цэкIэгъэнымкIэ пшъэрылъ заулэ къагъэу­цугъ. УФ-м гъэсэныгъэмкIэ иминистрэ игуадзэу Андрей Николаевым зэрэхигъэу­нэфыкIыгъэмкIэ, Iоныгъом и 1-м ехъулIэу псэолъэшIыныр зыухыгъэхэмкIэ ыкIи проектхэм ягъэцэкIэнкIэ Адыгеир шъо­лъы­рым исубъект анахь дэгъухэм аха­лъытагъ.
Зэхэсыгъом икIэух Владимир Устиновым Къыблэ федеральнэ шъолъырым исубъектхэм япащэхэм пшъэрылъ афи­шIыгъ бюджет мылъкур игъом гъэфедэгъэнымкIэ, социальнэ псэуалъэхэм яшIын­кIэ ыкIи ягъэцэкIэжьынкIэ ищыкIэгъэ амалхэр икъоу зэрахьанхэу.
АР-м и ЛIышъхьэ ипресс-къулыкъу къытырэ къэбархэмкIэ
ЛIышэ Саныет.