Хэбзэ хьалэмэт хъугъэу классическэ мэкъамэм иконцерт зэIухыгъэхэр зыгъэпсэфыпIэ мэз паркэу Мэздахэ щызэхащэх. Зичэзыу Iофтхьабзэр тыгъуасэ гуIэтыпIэу ащ щыкIуагъ. АР-м культурэмкIэ и Министерствэрэ АР-м и Концерт зэхахьэрэ ащ кIэщакIо фэхъугъэх.

АР-м и Концерт зэхахьэ и Къэралыгъо симфоническэ оркестрэ иконцерт цIыфыбэ къекIолIэгъагъ. Искусствэ лъагэ­мрэ чIыопсымрэ гъэшIэгъонэу ащ щызэкIугъ. Ныбжьым емылъытыгъэу, культурнэ Iофтхьэбзэ дахэм гухахъо хагъуатэу зыщагъэпсэфыгъ.
— Мыщ фэдэ хъугъэ-шIагъэм угу лъэшэу къыдещае. «Кином къыхэхыгъэ мэкъамэхэр» зыцIэ программэу оркестрэм къытыгъэр пстэуми агу нэсыгъ. ЗэхэщакIохэм ыкIи Къэралыгъо симфоническэ оркестрэм хэтхэм лъэшэу сафэраз. Кинофильмхэм къахэхыгъэ мэкъамэхэу тызэрагъэдэIугъэхэр хьа­лэмэтыгъэх, — хигъэунэфыкIыгъ АР-м и ЛIышъхьэу КъумпIыл Мурат.
Урыс лъэпкъ музыкальнэ Iэмэ-псымэхэм я Къэралыгъо оркестрэу «Русская удаль» зыфиIорэм иконцерти Мэздахэ шIэхэу щыкIощт. Лъэпкъ мэкъэмэ дахэхэм япрограммэ ащ къытыщт. АР-м и ЛIышъхьэ къызэрэхигъэщырэмкIэ, ащ фэдэ Iофтхьабзэхэу лIэуж зэфэшъхьаф­хэмрэ мэкъэмэ зэмылIэужыгъохэмрэ зэзыщалIэхэрэм мэхьанэшхо яI. Тикультурэ пстэуми зэранэсырэм дакIоу, зыгъэпсэфыгъор гуIэтыпIэ ашIы.