Урысые зэнэкъокъоу «Илъэсым иунагъу» зыфиIорэм изэхэщэкIо комитет текIоныгъэ къыдэзыхыгъэхэм ацIэ къыриIуагъ.

Джэджэ районымкIэ псэупIэу Сергиевскэм щыщ Волошин Василий Василий ыкъомрэ Светланэ Анатолий ыпхъумрэ яунагъо текIоныгъэ къыдэзыхыгъэхэм ахэфагъэх.
Илъэс къэс мыщ фэдэ зэнэкъокъум унэгъо 4000-м ехъу хэлажьэ, мыгъэ япшIэнэрэу ар зэхащагъ. «Бын-унэгъо Iужъу», «Унэгъо ныбжьыкI», «Къуаджэм дэс унагъу», «Унэгъо дышъ», «Шэн-хэбзэшIухэм яухъумэкIо унагъу», «Хэгъэ­гум иухъумакIо иунагъу» зыфиIорэ лъэныкъохэмкIэ зэнэкъокъум хэлэжьагъэхэм уасэ къафашIыгъ.
Волошинхэм яунагъо «Бын-унэгъо Iужъу» зыфиIорэ лъэныкъом щатекIуагъ. Чъэпыогъум ахэр Москва кIощтых, Къэ­ралыгъо Кремлевскэ ордэунэшхом тын лъапIэр къащаратыжьыщт.
Волошин зэшъхьэгъусэхэр зы щыIэныгъэ гъогу зырыкIохэрэр илъэс 37-рэ хъугъэ. Ахэм ябын-унэгъо зэгурыIожь кIэли 4-рэ пхъорэлъфи 5-рэ щапIу. Унагъом ышъхьэу Василий Василий ыкъор исэнэхьаткIэ ветеринар фельдшер, къы­гъэшIагъэм мэкъу-мэщым щэлажьэ. Светланэ Анатолий ыпхъур Сергиевскэ къоджэ псэупIэм цIыфхэм ясоциальнэ фэIо-фашIэхэр гъэцэкIэгъэнхэмкIэ и Гупчэ икъутамэу N 6-м ипащ.
«Тинахьыжъхэм гущыIэ закъокIэ арымырэу, щысэ афэхъухэзэ, якIэлэцIыкIу­хэмрэ япхъорэлъфхэмрэ зэрапIурэм, гуфэкIо IофшIэным, шIушIэ, патриотическэ, творческэ, спорт Iофтхьабзэхэм ахэр зэрахагъэлажьэхэрэм мэхьанэшхо иI.
Тиобществэ уасэ зыфишIырэ шэн-хэбзэшIухэм мы унагъор арэгъуазэ. Мыщ фэдэ унэгъуабэ тиреспубликэ зэрисыр сигуапэу къэсэIо. Илъэс къэс пIоми хъунэу Адыгеим илIыкIохэм зэнэкъо­къоу «Илъэсым иунагъу» зыфиIорэми, нэ­- мыкI Iофтхьабзэхэми текIоныгъэ къащыдахы.
Адыгеим щыщ унагъом зичэзыу текIоныгъэу къыдихыгъэм къеушыхьаты хэбзэ шIагъохэр тиреспубликэ илъ зэрэхъурэр. Адыгеим ис унэгъо Iужъу­хэу зэгурыIоныгъэрэ зэдэIэпыIэжьныгъэрэ зэрылъхэр илъэс къэс нахьыбэ мэхъух. Джыдэдэм ащ фэдэ унэгъо мини 9,6-м ехъу республикэм щэпсэу.
— Лъэпкъ проектэу «Унагъу» зыфи­Iорэр, Президентыр кIэщакIо зы­фэхъугъэ Iоф­тхьабзэхэу ныхэмрэ кIэ­лэцIыкIухэмрэ IэпыIэгъу ягъэгъотыгъэным, демографиемкIэ Iофхэм язытет нахьышIу шIыгъэным атегъэ­псыхьагъэхэр зэрагъэцакIэ­рэм тицыхьэ тырегъэлъы мы лъэныкъом­кIэ Iофхэр нахь зэрэлъыкIотэщтхэм», — ритхагъ АР-м и ЛIышъхьэу КъумпIыл Мурат ихъытыу нэкIубгъо.