«Зыгъэпсэфыгъо кIыхьэм»икIэух едзыгъо хэлажьэх
ШышъхьэIум и 31-м Урысые кIэлэцIыкIу гупчэу «Сменэм» Урысые зэнэкъокъоу «Зыгъэпсэфыгъо кIыхьэм» икIэух едзыгъоу я 9 — 11-рэ классхэм ащеджэхэрэр зыхэлажьэхэрэр щырагъэжьагъ.
Къыблэ федеральнэ шъолъырым икIыгъэ кIалэхэр зэнэкъокъум хэлажьэх, ахэм Адыгэ Республикэм щыщ кIэлэеджэкIо 20 ахэт.
Урысые зэнэкъокъоу «Зыгъэпсэфыгъо кIыхьэр» — «Апэрэхэм я Движение» ипроект шъхьаI. Зэнэкъокъур зэхэщэгъэнымкIэ яIэпыIэгъух ныбжьыкIэ IофхэмкIэ Федеральнэ агентствэр (Росмолодежыр), гъэсэныгъэмрэ шIэныгъэмрэкIэ ыкIи просвещениемкIэ Урысыем иминистерствэхэр. 2025-рэ илъэсым къыщыублагъэу «Зыгъэпсэфыгъо кIыхьэр» лъэпкъ проектэу «НыбжьыкIэхэмрэ кIэлэцIыкIухэмрэ» зыфиIорэм щыщэу хъугъэ.
«Илъэс пчъагъэхэм «Апэрэхэм я Движение» ипроект шъхьаIэу «Зыгъэпсэфыгъо кIыхьэм» сэнаущыгъэ зыхэлъ ныбжьыкIэхэу Урысыем ис закъохэр арэп, IэкIыб хэгъэгухэм ащыпсэухэрэри къеугъоих. ТапэкIэ ныбжьыкIэмэ гъэсэныгъэ программэмрэ зэнэкъокъу мафэхэмрэ къяжэх. Сицыхьэ телъ нэбгырэ пэпчъ зэнэкъокъум чанэу зэрэхэлэжьэщтым, джащ фэдэу ныбджэгъухэри къызэращыфэхъущтхэми», — къыIуагъ Урысыем и ЛIыхъужъэу, президентскэ программэу «ЛIыхъужъхэм яуахътэ» хэлажьэу, «Апэрэхэм я Движение» игъэIорышIапIэ итхьаматэу Артур Орловым.
Къалэхэу Мыекъуапэрэ Адыгэкъалэрэ, Красногвардейскэ, Тэхъутэмыкъое, Джэджэ районхэм ащыщ кIэлэеджакIомэ дэгъу дэдэу зэнэкъокъум зыкъыщагъэлъэгъуагъ. ПэIудзыгъэ шIыкIэкIэ кIогъэ зэнэкъокъум апэ псынкIэу ахэр пхырыкIыгъэх. Джы адрэ кIэлэеджакIохэу Къыблэ федеральнэ шъолъырым ичIыпIэ зэфэшъхьафхэм къарыкIыгъэхэм ахэтхэу зэнэкъокъущтых. Финалныкъом ипрограммэ хэтхэр: гъэсэныгъэ лекциехэр, мастер-классхэр, зэдэгущыIэгъухэр, кейсовэ гъэцэкIэнхэр, культурнэ-зыгъэпсэфыгъо уахътэр.
Яхэнэрэ едзыгъом хэхьэрэ темэу зэкIэхэми зэдыряIэр — «Гухэлъыр нэфапIэ пшIыныр». Хэгъэгум иухъумакIохэм я Илъэсэу Урысыем и Президентэу Владимир Путиным къыгъэнэфагъэм ыкIи Хэгъэгу зэошхом ТекIоныгъэр къызщыдахыгъэм ия 80-рэ илъэс къыдыхэлъытагъэу «ЛIэужхэм яшIэжь» зыцIэ темэмкIэ гъэцэкIэнхэр кIэу хагъэхьагъэх.
Финалныкъом текIоныгъэ къыщыдэзыхыхэрэр Урысые кIэлэцIыкIу гупчэу «Артекым» щыкIощт финалым хэлэжьэщтых, ар мы илъэсым ишэкIогъу мазэ зэхащэщт. ШIухьафтын дэгъухэр, ахъщэ грантхэу гъэсэныгъэм фытегъэпсыхьагъэхэри зэрахэтхэу, ащ къыщыдахынхэ алъэкIыщт.