Россельхознадзорым и Къыблэ гъэIорышIапIэ ипащэхэмрэ АР-м хэгъэгу кIоцI IофхэмкIэ и Министерствэ и Къэралыгъо автоинспекцие иIофышIэхэмрэ зэгъусэхэу «КъэкIыхэрэм якарантин фэгъэхьыгъ» зыфиIорэ Феде­ральнэ хэбзэгъэуцугъэу N 206-р зыукъохэрэм якъыхэгъэщынкIэ уплъэкIун Iофтхьабзэ­хэр зэхащагъэх.

Шъолъырым къыщагъэкIырэ ыкIи ащэнэу ращырэ коцым, хьэм, тыгъэгъазм, натрыфым, соем, пхъэшъхьэ-мышъхьэхэм язытет шапхъэмэ зэрадиштэ­хэрэр, уз зэрахэмылъыр къэзыушыхьатырэ тхылъхэр ягъу­сэнхэ фае.
Илъэсыр къызихьагъэм къыщыублагъэу Iоныгъо мазэм нэс фэдэ уплъэкIунхэу 7 зэхащэ­гъагъ, къэкIыхэрэр ыкIи пхъэшъхьэ-мышъхьэхэр зезыщэрэ автомобили 150-рэ ауплъэкIугъ.
Россельхознадзорым и Къыблэ гъэIорышIапIэ икъэралыгъо инспектор шъхьаIэу ГъукIэлI Руслъан къызэриушыхьатырэмкIэ, ауплъэкIугъэхэм зэкIэми ищыкIэгъэ тхылъхэр аIыгъыгъэх, шапхъэхэр зыукъуагъэ къахэкIыгъэп.
Шъугу къэдгъэкIыжьын, ауплъэкIурэ гъомылапхъэхэм якъыдэгъэкIын, ягъэхьазырын, язещэн, яухъумэн, ягъэфедэн ыкIи ящэн фэгъэхьыгъэ шап­хъэу щыIэхэр зыукъохэрэм ад­министративнэ тазыр атыралъхьэ. ГущыIэм пае, цIыф къызэрыкIохэм — сомэ 200-м къыщыублагъэу 500-м, Iэна­тIэ зыIыгъыхэм — сомэ 500-м щегъэжьагъэу сомэ 1000-м, юридическэ лицокIэ зызымытхыгъэ сатыушIхэм — сомэ 500-м къыщыублагъэу сомэ 1000-м нэсэу тазыр атыралъхьэ е яIофшIэн чэщ-зымэфэ 90-кIэ зэпагъэу, юридическэ ли­цохэм — сомэ мини 5-м щегъэжьагъэу мини 10-м нэс тазырэу атыралъхьэ е джащ фэдэу административнэу яIофшIэн чэщ-зымэфэ 90-кIэ зэпагъэу.
Шапхъэу щыIэхэр амыу­къонхэу Россельхознадзорым и Къыблэ гъэIорышIапIэ иIофы­шIэхэр гъомылапхъэхэр къы­дэзыгъэкIыхэрэм ыкIи зезыщэхэрэм къяджэх.