Терроризмэм хэщагъэу алъытагъ
Къалэу Ростов-на-Дону и Къыблэ кой идзэ хьыкум Адыгеим щыщ хъулъфыгъэу
илъэс 18 зыныбжьым иIоф хэплъагъ.
Ар Урысыем и Уголовнэ кодекс ия 205,2-рэ статья ия 2-рэ Iахь къыщыдэлъытэгъэ бзэджэшIагъэ зэрихьагъэу, терроризмэм шъхьэихыгъэу дыригъаштэу, интернетыр ыгъэфедэзэ нэмыкIхэр ащ хищэнхэм ыуж итыгъэу агъэмысагъ.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ иIофышIэхэм зэрагъэунэфыгъэмкIэ, В. В. Шевцовым интернет-мессенджерэу «Телеграмым» нэкIубгъоу щыриIэр ыгъэфедэзэ, террористическэ организацием иIофшIэн фэгъэхьыгъэ къэбархэр, видеоматериалхэр, еплъыкIэхэр цIыфхэм алъигъэIэсыщтыгъэх.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ уголовнэ Iоф къызэIуихи, зэхэфынхэр кIуагъэх.
Къалэу Ростов-на-Дону и Къыблэ кой идзэ хьыкум Iофым зыхаплъэм, В. В. Шевцовыр СИЗО-м зэрэдэсыгъэ уахътэр къыдилъыти, сомэ мин 40 тазырэу ыкIи интернет нэкIубгъо ыгъэпсын фимытыжьэу тырилъхьагъ.
Хьыкумым иунашъо кIуачIэ иIэ хъугъэ.
ЩынэгъончъэнымкIэ Федеральнэ къулыкъум АР-мкIэ и ГъэIорышIапIэ ипресс-къулыкъу