Урысыем иныбжьыкIэхэм ягъэ­мэфэ Спартакиадэ къыдыхэлъы­тагъэу, нэбгырэ миллионым нэс зы­щыпсэурэ шъолъыр 36-мэ азы­фагу зэхащэгъэ зэнэкъокъум Адыгэ Респуб­ликэм икомандэ анахь баллыбэ щыригъэкъугъ ыкIи текIоныгъэ къыди­хыгъ. ГъэхъэгъэшIоу ышIыгъэм­кIэ командэм фэгушIуагъ АР-м и ЛIышъхьэу КъумпIыл Мурат.

Къэралыгъом ишъолъыр 87-мэ яспорт­смен мини 10-м ехъу Iофтхьабзэм хэлэжьагъ. Ахэр хэшыпыкIыгъэ командэхэм ахэтхэу спорт лъэпкъ 51-мкIэ зэнэкъо­къугъэх.
— Адыгеим илIыкIохэм спорт лъэпкъи 10-м защаушэтыгъ ыкIи очкоуи 125-рэ рагъэкъугъ. Ащ къыкIэлъыкIоу Урысыем иныбжьыкIэхэм я Спартакиадэ апэрэ чIыпIэр къыщыдахыгъ, — къащитхыгъ социальнэ хъытыухэм республикэм ипащэ.
Адыгеим и ЛIышъхьэ къызэрэхигъэщыгъэмкIэ, УФ-м спортымкIэ и Министерствэ зэхищэрэ зэхэубытэгъэ зэнэ­къо­ъухэм къэралыгъомкIэ мэхьанэшхо яI ыкIи шъо­лъырхэм спортым хэхъоныгъэ зэрэщашIырэм якъэгъэлъэгъонэу щыт.
— Спортсменхэм ыкIи ахэм ятренерхэм сафэгушIо гъэхъэгъэшхоу ашIыгъэмкIэ. Спартакиадэм текIоныгъэр къы­зэрэщыдэтхыгъэм джыри зэ къеушы­хьаты спорт инфраструктурэм хэхъоныгъэ ышIынымкIэ, спорт жъугъэм имэхьанэ зыкъегъэIэтыгъэнымкIэ ыкIи лъэ­гэпIэ инхэм анэсырэ спортым Iэпы­Iэгъу фэхъу­гъэнымкIэ Iофэу тшIэрэм шIуагъэ къызэритырэр. Спортым мэхьанэшхо зыщыратырэ ыкIи псауныгъэр зыщагъэпытэрэ шъолъырэу щыт Адыгеим тапэкIи ищытхъу зэрэIущтым сицыхьэ телъ, — къыхигъэщыгъ КъумпIыл Мурат.