Адыгеим ифутбольнэ командэу «Зэкъошныгъэм» илIыкIохэм Мыекъопэ районым щыIэ гъэсэныгъэ Гупчэу N 4-м иятIонэрэ класс исхэм Iофтхьэбзэ гъэшIэгъон афызэхащагъ. Гухэлъэу «Футболыр еджапIэм» зыфиIорэм къыдыхэлъытагъэу зэIукIэгъур рагъэкIокIыгъ.

ШIэныгъэм и Мафэ ехъулIэу кIэлэеджакIохэм гущыIэгъу афэ­хъу­гъэх командэм ипащэу Къошк Рустем, футболистхэу Вячеслав Ру, Хьасанэкъо Амир, Лъащэкъо Ренат ыкIи Адыгэ Республикэм футболымкIэ и Федерацие илIыкIоу Константин Поминовыр.
Лъэныкъохэм шъхьэихыгъэ зэдэгущыIэгъу зэдыряIагъ. Адыгеим щызэлъашIэрэ футболистхэр ягъэхъагъэхэмкIэ кIэлэеджакIохэм адэгощагъэх, текIоныгъэр къыдэпхынымкIэ анахьэу унаIэ зытебгъэтын фаехэр къафаIотагъэх. Уигухэлъхэр къыбдэхъунхэм фэшI дэгъоу уеджэным мэхьанэшхо зэриIэр агурагъэIуагъ. КIэлэеджа­кIохэм упчIэ зэфэшъхьафхэр къатыгъэх, игъэкIотыгъэ джэуап­хэр агъотыжьыгъэх, зэIукIэгъур зэрэрекIокIыгъэм ыгъэрэзагъэх.
Iофтхьабзэм икIэух хьакIэхэм къагъэхьазырыгъэ шIухьафтынхэр ятIонэрэ классым исхэм аратыжьыгъэх. Мы спорт лъэпкъым шъолъырым зыщиушъомбгъуным, ащ пыщэгъэ ныбжьыкIэхэм япчъа­гъэ нахьыбэ хъуным мыщ фэдэ зэIукIэгъухэр зэрафэIорышIэхэрэр «Зэкъошныгъэм» илIыкIохэм хагъэунэфыкIыгъ.