Лъэс зекIонымкIэ къэралыгъом ичемпионат хэлэжьэрэ командэу «Мыекъуапэ 01-м» тIогъогогъо хагъэунэфыкIырэ чIыпIэ къыдихыгъ. Мыгъэ яплIэнэрэу зэхащэрэ Iофтхьабзэми ащ зыщиушэтыщт. Адыгеим икъэлэ шъхьаIэ къэзыгъэлъэгъорэ командэм 2022-рэ илъэсым яплIэнэрэ чIыпIэр къыфагъэшъошагъ, 2023-м ящэнэрэ хъугъэ, блэкIыгъэ илъэсым тыжьын медаль къыхьыгъ. Джы чемпион хъуным ар фэбэнэщт.

«Мыекъуапэ 01-м» зэнэкъокъум илъэныкъоу «Муниципальнэ командэхэр» зыфиIорэм зыщиушэтыщт. Джырэ уахътэм ехъулIэу ащ хэлэжьэнэу куп 263-мэ зарагъэтхыгъ. Командэ пэпчъ нэбгырэ 20-м къыщегъэжьагъэу 50-м нэс хэт. Мы мафэхэм пэшIорыгъэшъ едзыгъор рагъэжьагъ ыкIи ар Iоныгъом и 15-м нэс кIощт. Ащ ыуж, Iоныгъом и 20-м, зэнэкъокъум иIахь шъхьаIэ рагъэжьэнышъ, чъэпы­огъум и 20-м нэс кIощт.
ТекIоныгъэм уфэбэнэным пае командэм хэт нэбгырэ пэпчъ мафэм лъэбэкъу мин 25-м (километрэ 18 фэдиз) нахь мымакIэу къыкIун фае. Урысые мобильнэ приложениеу «КIорэ цIыфыр» зыфиIорэр къызфагъэфедэзэ зэнэкъокъур рагъэ­кIокIы. ШIоигъоныгъэ зиIэхэр зэкIэ Iофтхьабзэм хэлэжьэнхэ алъэкIыщт. Ащ пае командэ уугъоин ищыкIагъ.
Зызщыуушэтын плъэкIыщт лъэныкъохэр: «ЗОЖ-м икупхэр», «Пенсионерхэм якомандэхэр», «Студентхэм якомандэхэр», «Корпоративнэ командэхэр», «Унэгъо командэхэр» ыкIи «Муниципальнэ командэхэр».