Тхылъ ермэлыкъым рагъэблагъэх
Адыгэ къэралыгъо университетым итхылъ тедзапIэ Москва щыкIорэ дунэе тхылъ ермэлыкъым хэлажьэ.
Хэгъэгум итхылъкъэгъэлъэгъопIэ анахьыжъым мы илъэсым Урысыем ишъолъырхэм, джащ фэдэу Беларусым, Индием, Иран, Китаим, Зэхэт Араб Эмиратхэм, Саудовскэ Аравием ыкIи Темыр Кореим ятхылъ тедзэпIэ 300-м ехъу къызэлъиубытыгъ. Адыгеим ыцIэкIэ ащ хэлажьэрэр Адыгэ къэралыгъо университетым итхылъ тедзапI.
Мы Iофтхьабзэм изэхэщэнкIэ IэпыIэгъу афэхъугъэх цифрэ хэхъоныгъэмкIэ, зэпхыныгъэхэмкIэ, зэлъыIэсыкIэ амалхэмкIэ Урысые Федерацием и Министерствэ, Москва и Правительствэ, Урысыем тхылъхэмкIэ исоюз. Iофтхьабзэр ВДНХ-м щэкIо.
Тхылъ тедзапIэм истендэу щэтырэу «Молодежная литература/Комиксы» зыфиIорэм чIэтым кIэлэцIыкIухэм апае урысыбзэкIэ ыкIи адыгабзэкIэ тхыгъэу тхылъ 20-м ехъу хэт. «Адыгеим къикIыгъэ кIэлэцIыкIу литературэр» зыфиIорэм щыщхэри ахэм ахэхьэх. КIэлэцIыкIухэм апае литературнэ произведениехэм я Дунэе зэнэкъокъоу Жэнэ Къырымызэ ыцIэкIэ щытым текIоныгъэ къыщыдэзыхыгъэхэр ары ахэр зытхыгъэхэр, зэзыдзэкIыгъэхэр ыкIи сурэтхэу ягъусэхэр зышIыгъэхэр. 2022-рэ илъэсым къыщегъэжьагъэу илъэс къэс а зэнэкъокъур зэхащэ.
Культурэ программэм къыдыхэлъытагъэу тхылъхэм нэIуасэ афашIыщтых, лекциехэм къяджэщтых, тхакIохэм зэIукIэгъухэр адыряIэщтых. Ермэлыкъым къыщыгущыIэщтых Лия Арден, Павел Басинскэр, Евгений Водолазкиныр, Дарья Донцовар, Ася Лавринович, Александра Марининар, Захар Прилепиныр ыкIи нэмыкIыбэхэр.
КIэлэцIыкIу дунэе тхылъ ермэлыкъэу Москва щыкIощтыри дунэе тхылъ ермэлыкъым къыхеубытэ, апэрэу ащ фэдэ ермэлыкъ зызэхащэгъагъэр 2023-рэ илъэсыр ары. КIэлэцIыкIу тхылъ тедзэпIэ 50-м ехъу ермэлыкъым хэлэжьэщт, Iофтхьэбзи 100-м ехъу зэхащэщт: зэлъашIэрэ кIэлэцIыкIу тхакIохэм аIукIэщтых, мультфильмэхэр къагъэлъэгъощтых, мастер-классхэр, зэнэкъокъухэр зэхащэщтых.
Дунэе кIэлэцIыкIу тхылъ ермэлыкъым къыдыхэлъытагъэу Iоныгъом и 5-м мафэм сыхьатыр 12-м КIэлэцIыкIу сценэм тхылъэу «Андырхъое Хъусен» зыфиIорэм ипрезентацие щыкIощт. Апэрэ советскэ тхакIоу, Хэгъэгу зэошхом иилъэсхэм Советскэ Союзым и ЛIыхъужъыцIэ къызыфагъэшъошагъэм икIэлэцIыкIугъо, иныбжьыкIэгъу, лIыхъужъныгъэу зэрихьагъэм афэгъэхьыгъэ сурэт зэфэшъхьафхэр къагъэлъэгъощтых.
ШIоигъоныгъэ зиIэхэр зэкIэ рагъэблагъэх!