Республикэ кIэлэцIыкIу тхылъеджапIэу Ветеранхэм яурам тет унэу N 241-м хэтым гъэтхапэм и 10-м 2025-рэ илъэсым рагъэжьагъэу гъэцэкIэжьын-гъэкIэжьын IофшIэнышхо щэкIо.

Ащ ипащэу Елена Демьянковам тызэрэщигъэгъозагъэмкIэ, мы унэм тхылъеджапIэр зычIэтыр 1986-рэ илъэсым къыщыублагъ ыкIи илъэс 40-м къыкIоцI апэрэу гъэцэкIэжьынхэр рашIылIагъэх. ПсэолъэшI купэу Хьакъунэ Аскэр зипащэр ащ фэгъэзагъ.
— Мыщ фэдиз уахътэм хэти ыIэ зынэмысыгъэ тхылъеджапIэм сыдэущтэу гъэцэкIэжьын-гъэкIэжьыныр инасып къы­хьыгъа, хэта ащ пэIухьащт мылъкур къэзытыгъэр?
— Апэдэдэ гу зылъышъозгъатэ сшIоигъор тхылъеджапIэр лъэшэу гъэцэкIэжьынхэм зэрафэныкъуагъэр ары: квадрат метрэ 774,8 зыубытырэ унэр гъэкIэжьыгъэн, гъэкъэбзэгъэн фэягъ. Дэпкъхэр пэтагъэх, джэхашъори хэч-нэч закIэ хъугъагъэ. Электричествэм ирыкIуапIэхэр жъы дэдагъэх, ахэр зэкIэ зэблэхъугъэн­хэм игъо къэсыгъагъ. Бэрэ тежагъэми, тэгушIо Iоф­шIэнхэр зэрэрагъэжьагъэхэм фэшI.
— Непэ республикэ кIэлэцIыкIу тхылъ­еджапIэм нэбгырэ тхьапша щылажьэрэр ыкIи отдел тхьапша шъуиIэр?
— ТитхылъеджапIэ отдели 7 иI: еджапIэм джыри мыкIохэрэм ыкIи а I – IV-рэ классхэм яеджа­кIохэм афэгъэзагъэр;
— я 5 – 9-рэ классхэм ащеджэхэрэм атегъэ­псыхьагъэр;
— адыгэ литературэмрэ краеведениемрэкIэ отделыр;
— нотнэ-музыкальнэ отделыр;
— комплектованиемкIэ ыкIи фондхэмкIэ отделыр;
— методическэ IофшIэнымкIэ отделыр,
— библиографическэ ыкIи къыдэгъэкIын IофхэмкIэ отделыр.
— ЩыкIэгъэ пстэоу тиIэмкIэ мылъку IэпыIэгъу къытфэхъугъэр лъэпкъ проектэу «Унагъор» ары. Ащ изы Iахьэу «Семейные ценности и культурная инфраструктура» зыфиIорэр ары тэ нахь къыттегъэпсыхьагъэу тыкъызхиубытагъэр. ЗэкIэ зэрэщытэу унэпкъыр зэхахыгъ, электричествэм ирыкIуапIэхэр агъэкIэжьыщтых. Федеральнэ ыкIи республикэ бюджетхэм къарыкIыгъэ ахъщэмкIэ гъэцэкIэжьынхэр ашIых.
— ГъэцэкIэжьынхэм охътэ тхьапша атекIодэщтыр?
— ГущыIэкIэ зэкIэ къэIогъэшIуми, унэ кIоцIи, пчъи, шъхьаныгъупчъи, джэхашъуи шъо ябгъэгъотыныр аукъодыеп, ау псэолъэшIхэм яIофшIакIэ тегъэразэ, 2026-рэ илъэсым Iоныгъом ыкIэм зэтегъэпсыхьажьын-гъэкIэжьын IофшIэнышхор аухынэу тагъэгугъагъ.
— Елена Николаевна, адэ мы уахътэм Адыгэ республикэ кIэлэцIыкIу тхылъеджапIэр мэлажьа, тыда чIыпIэу шъуздэкIуа­гъэр?
— Тхылъ фондышхор зэрэщытэу бгъэкощыныр ыкIи нэмыкI чIыпIэм зыщызэIупхыныр псынкIэп, ау ари тфэукIочIыгъ. Урамэу Пушкиным тет унэу N 183-м (тапэкIэ аптекагъ) тыкощыгъ. ЗэрэтлъэкIэу, тиIоф тегугъоу тэшIэ. Анахьэу тыгу къэзыIэтырэр титхылъеджапIэ зэрагъэкIэжьырэр ары.
— Опсэу, гущыIэгъу укъызэрэтфэхъугъэмкIэ. ШъугушIоу, шъуиунэчIэхьажь мафэ дахэу къэсынэу сышъуфэлъаIо.

ДэгущыIагъэр
Мамырыкъо Нуриет.