Кушъхьэфэчъэ спортымкIэ зэнэкъокъоу «Темыр Кавказым щыпсэурэ лъэпкъхэм язэкъошныгъ» зыфиIорэм иапэрэ едзыгъо Адыгэ Республикэм щыкIуагъ. ТекIоныгъэм ия 80-рэ илъэс ихэгъэунэфыкIын къыдыхэлъытэгъэ Iофтхьабзэр Мыекъуапэ имемориальнэ саугъэт зэхэтым щырагъэжьагъ.

Спортсменхэр псэупIэхэу Калининым, Келермесскаям, Джа­джэм, Заревэм, Улапэ, Штурбинэм, Дукмасовым апхырыкIырэ гъогухэм арычъагъэх, нэужым республикэм икъэлэ шъхьаIэ къагъэзэжьыгъ ыкIи зэнэкъокъум иапэрэ уцугъо ащ щаухыгъ. Гъогу­уанэр зэкIэмкIи километри 138,7-рэ хъущтыгъ.
Урысыем, Республикэу Беларусь, Казахстан ыкIи Зэхэт Араб Эмиратхэм яспортсмен пэрытхэм ягъусэхэу зэнэкъокъум зыщаушэтыгъ республикэм илIыкIохэу СтIашъу Мамыр, Лъэустэнджэл Даниил, Вадим Ларичевым, Артем Гришко ыкIи Назар Сорочайкиным. ТикIалэхэм хагъэунэфыкIырэ чIыпIэхэр къыдахынхэ алъэ­кIыгъэп. Пэрытныгъэр ыубытыгъ командэу «Мангазея – Московскэ спорт» зыфиIорэр къэзыгъэлъэгъорэ Савва Новиковым. Тюмень хэкум къикIыгъэ Максим Поповым ятIонэрэ чIыпIэр фагъэшъошагъ, Республикэу Беларусь илIыкIоу Евгений Королек ящэнэрэ хъугъэ.
Урысыем кушъхьэфэчъэ спортымкIэ и Федерацие ипрезидентэу Юрий Кучерявэм мы спорт лъэп­къым республикэм зыщиушъомбгъуным зэнэкъокъур зэрэфэIорышIэрэр хигъэунэфыкIыгъ ыкIи ащкIэ зэхэщакIохэм афэрэзагъ.

— Мыр спорт зэнэкъокъоу зэрэщытым дакIоу, Темыр Кавказым щыпсэурэ лъэпкъхэм язэкъошныгъэрэ языкIыныгъэрэ гъэпытэ­гъэнхэм фэлажьэ, — къыIуагъ Ю. Кучерявэм.
Непэ ятIонэрэ едзыгъор аублэ. Спортсменхэр Мыекъуапэ икIынхэшъ, Кощхьэблэ районым икъутырэу Казенно-Кужорскэм нэсыщтых. Ахэм ягъогууанэ Мыекъопэ, Джэджэ, Шэуджэн ыкIи Кощ­хьэблэ районхэм апхырыкIыщт. Нэужым зэнэкъокъум хэлажьэ­хэрэм Краснодар краим загъэзэщт. Урысыем и Къыблэ ишъо­лъыри 6-мэ ячIыпIэхэм зэнэкъо­къур ащыкIощт, Чэчэн Респуб­ликэм щаухыщт. ЗэкIэмкIи километрэ 1945-рэ къачъыщт.