Адыгэ Республикэм ыкIи Пшызэ шъолъыр ащыпсэурэ быслъымэнхэм я ДиндэлэжьапIэ Iэнэ хъураеу тыгъуасэ зэхищэгъагъэм шъолъыр зэфэшъхьафхэм ябыслъымэнхэм ядин организациехэм ялIыкIохэр къекIолIэгъагъэх.

Iофтхьабзэр Темыр Кавказым ис быслъымэнхэм я Координационнэ Гупчэ ипроектхэм къадыхэлъытагъэу зэха­-щагъ, ислъам культурэм, наукэм ыкIи гъэсэныгъэм IэпыIэгъу ятыгъэнымкIэ Фондыр ащкIэ къадеIагъ. Терроризмэм пэшIуе­кIогъэнымкIэ дин организациехэм амалэу яIэхэр зэрагъэфедэнхэ фаер ары анахь шъхьаIэу ащ къыхэгъэщыгъа­гъэр.
Проектхэм къадыхэлъытагъэу мыщ фэдэ Iэнэ хъураехэр нэмыкI быслъымэн республикэхэми ащыкIуагъэх. Адыгеим чэзыур къынэсыгъэу мыгъэ щызэха­щагъ. Iэнэ хъураем къекIолIагъэхэм шIуфэс къарахыгъ Адыгэ Республикэм ыкIи Пшызэ шъолъыр ащыпсэурэ быслъымэн­хэм ямуфтиеу Къэрдэн Аскэрбый, АР-м лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет джырэблагъэ пащэ фашIыгъэ Долэ Долэтбый, ипэщагъэу Шъхьэлэхъо Аскэр, нэмыкIхэм.
Нэужым темэ шъхьаIэу Iофтхьабзэм иIэм фэгъэхьыгъэу дин организациехэм ялIыкIохэр къэгущыIагъэх. Терроризмэм, экстремизмэм ныбжьыкIэхэр ахэщагъэ мыхъунхэм, ядунэееплъыкIэ, уасэ зыфашIыхэрэм, неущырэ мафэмкIэ гухэлъэу яIэхэм шIуагъэрэ дэхагъэрэ нахьыбэу ахэлъыным фэшI анахьэу анаIэ зытырагъэтын фаеу алъэгъухэрэмкIэ ахэр къадэгощагъэх. Быслъымэн ыкIи чыристан динхэм апылъхэм осэ ин зыфашIырэ лъэныкъохэр зэфэдэх. Ахэр гъэпытэгъэнхэр ыкIи ныбжьыкIэхэм икъу фэдизэу алъыгъэIэсыгъэнхэр экстремизмэм пэшIуекIогъэнымкIэ анахьыбэу шIуагъэ къэзыхьырэ шIыкIэу зэралъы­тэрэр зэпстэумэ къыхагъэщыгъ.
ХЪУТ Нэфсэт.