Iоныгъом и 3-р – терактхэм ахэкIодагъэхэм, ащ епхыгъэ операциехэм япшъэрылъхэр щагъэцакIэхэзэ фэхыгъэ ухъумакIохэм яшъыгъо-шIэжь маф.

Зэкъотхэу терроризмэм зыщыпэуцужьыхэрэ мафэм щымыIэжьхэм ясаугъэтхэм, ямемориалхэм къэгъагъэхэр акIэралъхьэх, агу къагъэкIыжьых. Дунэе мэхьанэ зиIэ щынэгъошхом обществэмрэ къэралыгъомрэ зэкъотхэу зэребэныхэрэр мы зекIуакIэхэм къагъэлъагъо.
Мы мафэр хагъэунэфыкIыныр зэпхыгъэр 2004-рэ илъэсым къалэу Беслан къыщыхъугъэ тхьамыкIэгъошхоу, шIэныгъэм и Мафэ цIыфыбэхэмкIэ шъыгъо- шIэжь мафэ зыщыхъугъэр ары. МэфэкI линейкэр кIозэ, боевикхэр еджапIэм къыдахьэхи, кIэлэегъаджэхэр, еджакIохэр, ахэм яIахьылхэр аубытыгъэх. Нэбгырэ 1128-р чэщ-мэфищэ аIыгъыгъэх.
Жъалымыгъэ зыхэлъ терактым нэбгырэ 350-рэ хэкIодагъ. Ахэм ащыщэу нэбгыри 186-р – кIэлэцIыкIух, адрэхэр — бзылъфыгъэх, дзэ къулыкъушIэх. Нэбгырэ 500-м ехъурэмэ уIагъэхэр атещагъэх. Гъэрэу аIыгъхэр шъхьафит ашIы­жьынхэмкIэ Iофтхьабзэр окIофэ террорист 31-рэ аукIыгъ, зыр аубы­тыгъ.

Беслан хъугъэ-шIагъэр Урысыеми, нэмыкI къэралыгъохэми ащыпсэухэрэм ягухэкIышху, ягукъэошху, тхьамыкIэгъошхоу тарихъым къыхэнагъ. ЦIыфхэм анэп­схэр джыри гъушъыгъэхэп.
— Беслан къыщыхъугъэ терактым хэкIодагъэхэм афэдэу Буденновскэ, Каспийскэ, Москва, Санкт-Петербург, Волгодонскэ, Буйнакскэ, Волгоград, Первомайскэм, Владикавказ, нэмыкI къалэхэми ащыщхэу террористхэм аIэкIэкIодагъэхэр тщыгъупшэхэрэп. Ащ фэдэ хьэкIэ-къокIагъэм тидунай чIыпIэ щыриIэнэу щытэп. Терроризмэр щыIэны­гъэм къыхэмыфэным зэкIэми тызэгъусэу тыфэбэнэщт, къыткIэхъухьэрэ лIэужхэм мамыр щыIакIэ яIэным тыфэлэжьэщт, — АР-м и ЛIышъхьэу КъумпIыл Мурат ихъытыу нэкIубгъохэм къащитхыгъ.
Агу къагъэкIыжьыгъэх
Терроризмэм пэшIуекIогъэным и Мафэ ехъулIэу республикэм Iофтхьэбзабэ щырагъэкIокIыгъ. Ахэм ащыщ Мыекъуапэ илицееу N 35-м шIэжь Iофтхьабзэу тыгъуасэ щыкIуагъэр. ЕджакIохэм кIэлэ­егъаджэхэр ягъусэхэу террористическэ нэшанэ зиIэ зэпэуцужьхэм, хэушъхьафыкIыгъэ къулыкъухэм яIофышIэхэу ыкIи хэбзэухъумакIохэу зипшъэрылъхэр зыгъэцакIэхэзэ ахэм ахэкIодагъэхэм яшIэжь агъэлъэпIагъ.
— ТиеджапIэкIэ мэхьанэ зэттырэ мафэхэм мыр ащыщ ыкIи илъэс къэс зэрифэшъуашэу хэтэгъэунэфыкIы. Беслан къыщыхъугъэ тхьамыкIагъом хэкIода­гъэхэм ямызакъоу, Урысыем инэмыкI къалэхэми терактхэм ащыхэкIодагъэхэми тафэшъыгъо. Терроризмэм зэрарэу къы­хьырэр, ащ тыпэуцун зэрэфаер тиеджа­кIохэм агурытэгъаIо, ошIэ-дэмышIагъэ горэм хэфагъэхэмэ, зэрэзекIонхэ фаер къафэтэIуатэ. Илъэс заулэкIэ узэкIэIэбэ­жьмэ, лицеим ипащэу Анастасия Эйх­вальд, сэры ыкIи кIэлэеджакIохэм ащыщ­хэр тигъусэхэу къалэу Беслан тыщы­Iагъ. Шъыгъо-шIэжь зэхахьэу ащ щыкIуагъэм тыхэлэжьагъ, спортивнэ залэу гъэрэу зыщаIыгъыгъэхэми тычIэхьагъ. Гу къытфэнагъэп, непэ къызнэсыгъэми нэпсэу ащ щырагъэхырэр жэм къыхьырэп, — къыIуагъ лицеим ипащэ пIуныгъэ IофымкIэ игуадзэу Мамсыр Азэ.
Хъугъэ-шIагъэм игъэкIотыгъэу къытегущыIагъэх, Iофтхьабзэм къыщызэрэугъо­игъэхэр зишIэжь агъэлъапIэхэрэм зы такъикъэ афэшъыгъуагъэх.
Iэшъынэ Сусан.