КIэлэцIыкIухэм афэгъэхьыгъэ лите­ратурэ тхыгъэхэмкIэ Дунэе зэнэкъокъоу Жэнэ Къырымызэ ыцIэ зыхьырэм хэ­лажьэ зышIоигъохэм яIофшIагъэхэр атынхэм ипIалъэ икIыгъ. Мэкъуогъум и 1-м къыщегъэ­жьагъэу шышъхьэIум и 31-м нэс ар кIуагъэ.

ОсэшI купым хэтэу, фи­лологие шIэныгъэхэмкIэ кандидатэу Хъуажъ Нуриет къызэриIуагъэмкIэ, пстэумкIи нэбгырэ 40-мэ яIофшIэгъэ 80-м ехъу зэнэкъокъум къагъэ­хьыгъ. Ахэм янахьыбэр Адыгеимрэ къош респуб­ликэхэмрэ ащыщых, рес­публикэу Беларусь ыкIи Урысыем инэмыкI шъо­лъырхэм якъалэхэм ащы­псэухэрэри ахэтых. Лъэныкъо зэфэшъхьафхэмкIэ ягугъу пшIын хъумэ, усэм ылъэныкъокIэ нэбгырэ 11 хэлэжьагъ. Ахэм IофшIэгъэ 36-рэ къагъэхьыгъ. ПрозэмкIэ — нэбгырэ 13, тхыгъэу — 19. ЗэдзэкIынымкIэ нэбгырэ 11-мэ IофшIэгъэ 15 къагъэлъэгъуагъ, сурэт 21-рэ нэбгыритфымэ къагъэхьа­зырыгъ.
Хъуажъ Нуриет — зэнэкъокъум иосэшI куп хэт:
— Анахьэу згъэшIэгъуагъэр усэм ылъэныкъокIэ IофшIэгъабэ къызэрэрахьылIагъэр ары. Къыхэхыгъуае тфэхъущт, ау гъэшIэгъоныщт. Тэри ары тызыфэягъэр. ЕтIанэ, адыгабзэкIэ нахьыбэу къэтхэнхэм тыкIэхъопсыщтыгъэти, ари къыддэхъугъ. Зэ­дзэкIынымкIи тызхэплъэн щыI.
Шъугу къэдгъэкIыжьын, мы зэнэкъокъум цIэу иIагъэр «ЦIыкIу­жъый». Илъэси 3 — 5 зыныбжьыхэм ателъытэгъэ тхыгъэхэр, зэдзэкIы­гъэхэр, сурэтхэр ­къыугъоинхэр ипшъэ­рылъыгъ. Ха­бзэ зэрэхъугъэу, адыгабзэкIэ, къэ­бэртэябзэкIэ, урысыбзэкIэ ар рекIо­кIыгъ.
ПстэумкIи лъэныкъуищ къыдыхэлъытэгъагъ:
— усэ ыкIи прозэ шъуашэм илъхэу илъэси 3 — 5 зы­ныбжь кIэлэцIыкIу­мэ афэгъэхьыгъэ тхыгъэхэр;
— илъэси 3 — 5 зыныбжь кIэлэцIыкIу­мэ афэгъэхьыгъэ тхыгъэхэм яхьылIэгъэ сурэтхэр;
— илъэси 3 — 5 зыныбжь кIэлэцIыкIумэ афэгъэхьыгъэ тхыгъэхэр адыга­бзэкIэ, къэбэртэя­бзэкIэ, урысыбзэкIэ зэдзэкIыгъэнхэр.
Зэнэкъокъум Адыгэ къэ­ралыгъо университетыр икIэщакIу. Ащ изэфэ­хьысыжьхэр шэкIогъум и 15-м къэнэфэщтых. Ащ нэс осэшI купыр IофшIагъэхэм ахэплъэщт.
Анцокъо Ирин.