«Нэфын»
ЗимэфэкI дахэ — илъэс 70-рэ ныбжьыр бэмышIэу хэзыгъэунэфыкIыгъэ усакIоу, тхакIоу ЛIыхэсэ Мухьдин 1975-рэ илъэсым къыщыублагъэу ытхыхэрэр хеутых.
Ар Адыгэ Республикэм и Къэралыгъо премие литературэмкIэ илауреат, АР-м искусствэхэмкIэ изаслуженнэ IофышI.
Иапэрэ поэтическэ сборникэу «Гугъэм илъагъу» зыфиIорэр 1981-рэ илъэсым Адыгэ тхылъ тедзапIэм къыщыдэкIыгъ. Ащ къыкIэлъыкIуагъэх «Дэе мэз», «Жъогъо Iапчъ», «ШIулъэгъур щэIэфэ», «Гум илъэгапI», «Усэхэмрэ орэдхэмрэ», «ЛIэшIэгъумэ ашъохэр», урысыбзэкIэ «На сквозняке веков»,
«ХэшыпыкIыгъэ тхыгъэхэр» адыгабзэкIэ ыкIи урысыбзэкIэ, тхылъэу «Псэм ылъапсэхэр», нэмыкIхэри.
ЛIыхэсэ Мухьдин ипьесэхэу «ТэлIэми, тэтхъэ», «Нэфын», «Гумзагъ», «ЛIыхъужъ орэд» зыфиIохэрэм атехыгъэу спектаклэхэр АР-м и Лъэпкъ театрэ щагъэуцугъэх. «Нэфын» зыфиIорэр къэбэртэябзэкIэ зэдзэкIыгъэу Къэбэртэе-Бэлъкъар драматическэ театрэм ыгъэуцугъ.
БэмышIэу Мухьдин идраматургическэ тхыгъэхэр зэхэубытагъэу зыдэт тхылъэу «НэфынэкIэ» зэджагъэр АР-м итхылъ тедзапIэ къыщыдэкIыгъ. Ащ пьесэхэу «Нэфын», «ЛIыхъужъ орэд», «ТэлIэми, тэтхъэ», «Лъэпкъым итамыгъ», нэмыкIхэри къыдэхьагъэх. Пьесэхэм ахэлъ гупшысэм ыкIи хъугъэ-шIагъэхэм щыIэныгъэм лъэпсэ пытэ щыряI, ащ елъытыгъэу, цIыфым идунэееплъыкIэ авторым куоу ыкIи гъэшIэгъонэу къызэIуихын елъэкIы. ТхакIом драматургием ишэн-хабзэхэр иIэрыфэгъухэу образ зэфэшъхьафхэр тапашъхьэ къырегъэуцох, щыIэныгъэм хэлъ тхъагъуи, нэфыни, гумэкI-нэшхъэйи зэхытегъашIэ, зы мафэм адрэр къыкIимыIотыкIыжьэу, непи, неущи, тыгъуасэу блэкIыгъи нэрымылъэгъу гупшысэ инымкIэ зэрэзэрипхыгъэхэр авторым кIегъэтхъых, итворческэ гупшысэ дахэу мэлажьэ.
ТхылъыкIэу «Нэфынэм» иа I-рэ Iахь зыныбжь икъугъэхэм ыкIи ия II-рэ Iахь кIэлэцIыкIухэм атегъэпсыхьагъ. ЩыIэныгъэм дэгъуи дэйи хэлъыр сабыйхэм ыкIи еджакIохэм аригъашIэмэ шIоигъоу пьесэ-пшысэхэу «ШIушIагъэр кIодырэп», «КъэшIыгъо цIыкIухэр», «Цокъэ плъыжьхэр», «Хьацэм ыцэ зэрэIуачыгъэр», нэмыкIхэми лъэшэу ягугъугъ.
Тхылъыр нэкIубгъо 573-рэ мэхъу. ТхакIом иадыгэбзэ къэбзэ лъэш ахэм ащэIорышIэ, ахэм яджэхэрэм ягулъыти хэхъощт, абзи ыгъэбаищт, щыIэныгъэм нахь хэшIыкI фыряIэ хъущт.
Мамырыкъо Нуриет.