Top.Mail.Ru

Я 33-у Адыгеим къыщызэIуахыгъ

Image description
А. Iэшъын

Кушъхьэфэчъэ спортымкIэ зэнэкъокъоу «Темыр Кавказым щыпсэурэ лъэпкъхэм язэкъошныгъ» зыфиIорэр я 33-у Мыекъуапэ тыгъуасэ къыщызэIуахыгъ. Ащ фэгъэхьыгъэ мэфэкI Iофтхьабзэр Лениным ыцIэ зыхьырэ гупчэм щыкIуагъ.

Непэ Мыекъуапэ зэнэкъокъухэр щаублэщтых ыкIи Iоныгъом и 21-м ахэр Грознэм щаухыщтых. Мыгъэрэм хэлажьэх Урысыем ишъолъыр 12-мэ, Республикэу Беларусь, Казахстан, Зэхэт Араб Эмиратхэм яспортсмен анахь лъэшхэр. ЗэкIэмкIи зэрэхъухэрэр командипшI.
Хэгъэгу зэошхом ТекIоныгъэр къызщыдахыгъэр илъэс 80 зэрэхъугъэм мыгъэрэ зэнэкъокъур фэгъэхьыгъ. Спорт­сменхэр зыщызэпэчъэщтхэ гъогууанэм километрэ 1945-рэ икIыхьэгъэщт. Темыр-Кавказ федеральнэ шъолъырым иреспубликэхэм, Адыгеим ыкIи Краснодар краим, зэкIэмкIи шъолъырихмэ, кушъхьэфэчъэтесхэр апхырыкIыщтых.

А. Iэшъын


— Къытпыщылъ гъогууанэр псынкIэп, ау тэ ащ тыфэхьазыр. Зэнэкъокъум хэлажьэхэрэм сыди­гъокIи яшъыпкъэу ащ зыфагъэхьазыры. Мыгъэ ар зыфэгъэшъоша­гъэм елъытыгъэу тарихъ мэхьанэ иIэ хъугъэ, тигуапэу тыхэлажьэ, — къыIуагъ Санкт-Петербург къи­кIыгъэ Никита Семеновым.
ЗэхэщакIохэм зэрагъэнэфагъэмкIэ, апэрэ едзыгъом къыдыхэлъытагъэу спортсменхэм ягъогууанэ Iоныгъом и 3-м Мыекъуапэ щырагъэжьэщт – мемориальнэ саугъэт зэхэтым пчэдыжьым сыхьатыр пшIым щаублэщт. Станицэу Джаджэм, Шэуджэн районым ит поселкэу Заревэм, нэужым къуаджэу Улапэ, псэупIэу Штурбинэм, къутырэу Ореховым апхырыкIырэ гъогухэм арычъэнхэшъ, Мыекъуапэ къагъэзэжьыщт. ЗэкIэмки километри 138, 7-рэ къачъыщт.

А. Iэшъын
А. Iэшъын


— Гъогум щыкIорэ зэнэкъокъухэм ямэфэпчъ чIыпIэ хэхыгъэ щызыубытэу «Темыр Кавказым щыпсэурэ лъэпкъхэм язэкъошныгъ» зыфиIо­рэр хабзэ хъугъэу зэрэзэхатщэрэм Федерациер лъэшэу рэгушхо. Кавказым ичIыопс идэхагъэ зыщыплъэгъурэ гъогухэм спортсменхэр зэрапхырыкIыщтхэмкIэ ыкIи зэнэкъо­къум хэлажьэхэрэм яухьазырыныгъэ лъэшкIэ мы хъугъэ-шIагъэм лъып­лъэхэрэм ыкIи ежь спорт­сменхэм ар агу къызэринэжьыщтым сицыхьэ пытэ телъ, — къы­Iуагъ кушъхьэфэчъэ спортымкIэ Федерацием ипрезидентэу Юрий Кучерявэм.
Iоныгъом и 4-м ятIонэрэ едзыгъор рагъэжьэщт: Мыекъуапэ — Казенно-Кужорск, гъогууанэм икIыхьагъэр километ­ри 138,1-рэ. Къэнэжьырэ едзыгъохэр нэмыкI шъолъырхэм ащыкIощтых.
Арусяк
Авагимян.