Пушкиным ыцIэ зыхьырэ Унэр загъэпсыгъэр илъэси 125-рэ зэрэхъугъэм фэгъэхьыгъэ пчыхьэзэхахьэу тхэкIошхом иусэхэм къызщеджагъэхэр Театральнэ пчэгум тыгъуасэ щыкIуагъ.

АР-м и Театральнэ зэхахьэ Iофтхьабзэм изэхэщакIу. Пушкиным ыцIэ зыхьырэ урыс драматическэ театрэу Театральнэ зэхахьэм хахьэрэм иартист 20 пчы­хьэзэхахьэм хэлэжьагъ. Александр Пушкиным итхыгъэ 21-мэ къахэхыгъэ пычыгъохэм, усэхэм ахэр къяджагъэх. «Евгений Онегиным», «Полтавэм», «Граф Нулиным» къахэхыгъэ едзыгъохэр, «Клеветникам России», «Что в имени тебе моем» зыфиIорэ усэхэр пчэгум щагъэIугъэх. Культурнэ кIэным икъэу­хъумэн ыкIи ихэгъэхъон фэлэжьэрэ мэфэкI Iофтхьабзэхэм ясатыр къэгъэлъэгъоныр хэуцуагъ.

Пушкиныр зыщыпсэугъэ лъэхъаным къыхэхыгъэ образхэр видеопроекторым иамалкIэ пчыхьэзэхахьэм къыщагъэлъэ­гъуагъэх. УсакIор зыщыIэгъэ лIэшIэгъум ащыгъыщтыгъэ шъуашэхэм афэдэхэр ыкIи непэрэ уахътэм диштэхэрэр артистхэм зэблахъухэзэ блэкIыгъэ зэманым лъэпкъ тхэкIошхом ытхыщтыгъэхэр непэрэ мафэхэм зэрадиштэхэрэр сэнаущыгъэ хэлъэу къагъэлъэгъон алъэ­кIыгъ. Классическэ мэкъамэхэр езбырэу къа­Iорэм пэпчъ кIэлъыгъэх. А зэпстэум Iофтхьабзэм зэхэшIэ хэушъхьафыкIыгъэ къыуигъаштэщтыгъ.
АР-м и Театральнэ зэхахьэ ихудожественнэ пащэу Ацумыжъ Рустам культурнэ Iофтхьабзэу зэхащагъэм мэхьанэу ратырэр хигъэунэфыкIыгъ:
— Пушкиным итхыгъэхэм тыкъяджэн къодыеу щымытэу, игущыIэ пэпчъ пстэуми непи зэрэзэхатшIэрэр, джырэ уахътэм зэрэдиштэрэр къэдгъэлъагъомэ тшIоигъуагъ. Классическэ усэм ыкIуачIэ ныбжь зиIэхэми ныбжьыкIэхэми зэхашIэным мэхьанэшхо иIагъ.
Пушкиным ыцIэ зыхьырэ Унэр загъэ­псыгъэр илъэси 125-рэ зэрэхъугъэм фэгъэхьыгъэ Iофтхьабзэу зэхащагъэм цIыфыбэ къырищэлIагъ. ЗэIухыгъэ пчэгушхом тхэкIошхом иусэхэр дахэу щыIугъэх. Культурнэ гупчэ инэу ар зэрэщытыр пчыхьэзэхахьэм джыри зэ къыгъэ­нэфагъ.