ШIэныгъэм и Мафэ тефэу къуаджэу Хьакlэмзые игурыт еджапlэ иунэ натlэ тырашlыхьэгъэ сурэтышхор къызэlуа­хыгъ. «Еджапlэхэм яхьагъо-чlыгъохэр творческэу гъэкlэжьыгъэнхэр «Культурэм ишъхьангъупчъ я II-рэ lахь» зыфиlорэ проектым ар къыдыхэлъытагъ.

Кlэлэеджакlохэм ямызакъоу къуаджэм дэсхэмкlи lофтхьабзэр культурнэ хъугъэ- шlэгъэ ин. lофшlагъэм чылэгур джы къегъэдахэ. Квадрат метрэ 60 зэлъеубыты. Сурэтым ыгупчэ адыгэ лъэпкъ шъуашэхэр ащыгъхэу хъулъфыгъэрэ бзылъфыгъэрэ къыщэшъох. Лъэпкъыбэ зэрыс Урысыем хэпчын умылъэкlыщт черкес культурэр къагъэлъагъо. Къэралыгъо быракъым ышъохэмкlэ Урысыем ичlыгутх ахэм къяшlэкlыгъэу, ащ къы­хэкlырэ lэхэм, зэдэlэпыlэжьыным итамы­гъэхэм, къашъохэрэм зафащэи. Сурэтыр гъэшlэгъоны зышlырэр мы еджапlэм щеджэрэ Куржъо Данэ ышlыгъэм ар зэрэтехыгъэр ары.
Арышъ, lофшlагъэм чlыпlэр къыгъэ­дэхэщт къодыеп. Зыкlыныгъэм кlочlэ инэу хэлъыр, уилъэпкъ ылъапсэ уасэ фэпшlыным, нэмыкlхэм лъытэныгъэ афэпшlыным ямэхьанэ мафэ къэс кlэлэ­еджакlохэм агу къыгъэкlыжьыщт.
— Мы сурэтыр тикlэлэцlыкlухэм апае тарихъымкlэ, географиемкlэ ыкlи общественнэ шlэныгъэмкlэ нэрылъэгъу дес. Анахь шъхьаlэр ащ къеlуатэ: тызэфэшъхьаф, ау зыкlыныгъэ тхэлъ. Тишэн-хабзэхэр тэгъэлъапlэх, нэмыкIхэм яехэми лъытэныгъэ афэтэшlы. Ары непэ Урысыер кlочlэшlоу ыкlи утекlон умы­­- лъэ­кlынэу зышlырэр, — къыlуагъ проектыр зигукъэкlэу Карен Каракьян.
lофшlагъэм икъызэlухын хэлэжьагъэх Кощхьэблэ районым иадминистрацие илlыкlохэр, еджапlэм иlофышlэхэр, щеджэхэрэр, сурэтым ишlын хэлэжьэгъэ кlэлэеджэкlо-гуфакlохэр ыкlи мысатыу организациеу «Талантидэм» ипащэу Карен Каракьян.
Мэфэкl lофтхьабзэм къыдыхэлъытагъэу «Движение Первых» зыфиlорэм анахьэу уасэ зыфишIырэ лъэныкъохэр агу къагъэкlыжьыгъэх ыкlи сурэтхэм язэнэкъокъоу еджапlэм щырекlокlыгъэм текlоныгъэ къыщыдэзыхыгъэ нэбгырищмэ щэтрэхэр шlухьафтынэу аратыгъэх.
Хэкупсагъэ ахэлъэу сабыйхэр пlугъэн­хэм иlахьышlоу хилъхьэрэм фэшl еджапlэм ипащэу Элдар Инвер рэзэныгъэ тхылъыр проектыр зыгу къэкlыгъэ Карен Каракьян фигъэшъошагъ ыкlи сурэтыр къызэрэзэlуахырэм итамыгъэу бзыхьаф плъыжьыр зэпаупкlыгъ.
Къэlогъэн фае, «Еджапlэхэм яхьагъо- чlыгъохэр творческэу гъэкlэжьыгъэнхэр» «Культурэм ишъхьангъупчъ я II-рэ lахь» зыфиlорэр «Движение Первых» иахъщэ lэпыlэгъукlэ «Талантидэм» ыгъэ­цэ­кlагъ. Ащ къыдыхэлъытагъэу мы илъэсым Адыгеим иеджэпlипшlымэ ыкlи Пшызэ шъолъырымкIэ зым, пстэумкlи 11-мэ, арт-псэуалъэхэр ащашlыгъэх. Зэхэтэу ахэм квадрат метрэ 350-рэ зэлъаубытыгъ. «Движение Первых» зыфиlорэм ынаIэ зытыригъэтырэ Iофыгъо шъхьаIэхэм, зэныбджэгъуныгъэм и Илъэсэу хигъэунэфыкlырэм, ухъумакlом и Илъэсэу, Текlоныгъэм ия 80-рэ илъэ­сэу мыгъэ дгъэмэфэкlхэрэм IофшIагъэ­хэр афагъэхьыгъэх. Зичэзыу арт-псэуалъэр Апшеронскэ районым ия 15-рэ гу­рыт еджапlэ Iоныгъом и 10-м къыщызэlуахыщт.
Анцокъо Ирин.