ФутболымкIэ Урысыем изэнэкъокъу иятIонэрэ лигэ икупэу «Б-м» хэт «Зэкъошныгъэм» зичэзыу ешIэгъоу иIагъэм мэхьанэшхо зиIэ очкоуи 3 къыщихьыгъ. Я 24-рэ турым къыдыхэлъытагъэу тикомандэ «Динамо-2-м» (Махачкала) IукIагъ ыкIи текIоныгъэр къыдихыгъ.

«Зэкъошныгъ» — «Динамо-2» — 3:1 (1:1).
Къэлапчъэм Iэгуаор дэзыдзагъэхэр: М. Ибрагимовыр — я 29-рэ такъикъым, У. Магомедбековым — я 38-рэ такъикъым, А. Делэкъом — я 53-рэ такъи­къым, Г. Абдуллаевым — я 65-рэ такъикъым.
«Зэкъошныгъэм» щешIагъэх: Т. Хачировыр (къэлэпчъэIут), С. Черджиевыр, У. Магомедбековыр (П. Сотниковыр), Р. Трефиловыр, К. Антонец, Э. Цанава (Т. Едыджыр), А. Малкандуевыр (Т. Хьэхыр), З. Коблыр, Е. Рагулькиныр (И. Зинченкэр), Г. Абдуллаевыр, А. Делэкъор (Д. Антоненкэр).
Тренер шъхьаIэр — С. Мирошниченкэр.
«Динамо-2-м» хэтыгъэх: Б. Ражбудиновыр (къэлэпчъэIут), А. Хачаевыр, М. Ибрагимовыр, А. Шихалиевыр (С. Магомедовыр), И. Михтеевыр, Д. Алиевыр, К. Таштемировыр (Р. Телякавовыр), М. Арсланхановыр, М. Амирбековыр (А. Темирсултановыр), Р. Алиевыр (Б. Абдулжалиловыр), М. Ибрагимовыр.
Тренер шъхьаIэр — Р. Магомедовыр.
Апэрэ такъикъхэм къащегъэ­жьагъэу «Зэкъошныгъэр» ыпэкIэ илъынэу ригъэжьагъ. АщкIэ стадионым къыщызэрэугъоигъэ цIыфхэм яшIогъэшхо къагъакIощтыгъ. Ау къэлапчъэм апэу Iэгуа­ор дэзыдзагъэхэр хьакIэхэр ары. Умар Магомедбековым шапхъэхэр ыукъуагъ, ащ къыхэкIкIэ Р. Алиевым пенальти ыгъэцэкIэнэу фитыныгъэ ратыгъ. Тамирлан Хачировым Iэгуаор къызэкIи­дзагъ, ау Магомед Ибрагимовыр ятIо­нэрэу къэлапчъэм дэуагъ ыкIи пчъагъэр къызэIуихыгъ. Мыщ ыуж такъикъибгъу тешIагъэу тикомандэ пчъагъэр зэфэдиз ышIыгъ. Умар Магомедбековым ихэукъоныгъэ ыгъэтэрэзыжьыгъ, метрэ 35-рэ фэдизкIэ пэчыжьэу къэлап­чъэм дэуагъ — 1:1. Я 53-рэ такъикъым Делэкъо Аскэр пчъагъэм хигъэхъуагъ, тикомандэ 2:1-у ыпэ ишъыгъ. Я 65-рэ такъи­къым Гаджимурад Абдуллаевым ящэнэрэ Iэгуаор дидзагъ, пчъагъэр 3:1-у зэIукIэгъур аухыгъ.

— Апэрэ такъикъхэм къащегъэжьагъэу командэм къыгъэ­лъэгъогъэ ешIакIэм сигъэрэзагъ. Къэлапчъэм Iэгуаор дэтыдзэнымкIэ амалышIухэр тиIагъэх. Сифутболистхэм пчъагъэрэ ясIуагъ «Динамо-2-р» ухъумэным хэкIынышъ, псынкIэу ыпэ илъын зэрилъэкIыщтыр. Арэущтэуи хъугъэ, хьакIэхэм пчъагъэр къызэIуахын алъэ­кIыгъ. Ау нэужым цыхьэшIэгъоу тешIагъ, анахь шъхьа­Iэр текIоныгъэр къызэрэдэтхыгъэр ары. АщкIэ футболыр зыгу рихьыхэу республикэм щыпсэухэрэм сафэгушIо, — къыIуагъ «Зэкъошныгъэм» итренер шъхьаIэу Сергей Мирошниченкэм.
Я 24-рэ турым изэфэхьысыжьхэмкIэ, бысым командэхэу «Нарт» ыкIи «Шъачэ-2» текIоныгъэхэр къыдахыгъэх. Джащ фэдэу «Астрахань», «Кубань Холдинг», «Рубин Ялта» ыкIи «Динамо Ставрополь» зыфиIохэрэм очко щырыщ къахьыгъ. Пчъагъэр зэфэдизэу ешIэгъу аухыгъэп.
Я 24-рэ турым изэфэхьысыжьхэр:
«Зэкъошныгъ» — «Динамо-2» — 3:1, «Легион» — «Астрахань» — 0:1, «Ангушт» — «Кубань Холдинг» — 0:1, «Спартак-Налщык» — «Рубин Ялта» — 1:2, «Нарт» — «Победа» — 1:0, «Севастополь» — «Динамо Ставрополь» — 1:2, «Шъачэ-2» — «Ростов-2» — 2:0.
Джырэ уахътэм турнир таблицэм «Кубань Холдингым» пэрытныгъэр щиIыгъ, «Динамо Ставрополь» ятIонэр, «Севастопольрэ» «Победэрэ» ящэнэрэ чIыпIэр зэдагощы. «Зэкъошныгъэр» я 7-р. Зичэзыу ешIэгъур тикомандэ Iоныгъом и 6-м Мыекъуапэ щыриIэщт, «Победэр» тихьакIэщт.
Командэхэр зыдэщыт чIыпIэхэр ыкIи очко пчъа­гъэу рагъэкъугъэр:

1. «Кубань Холдинг» — 48.
2. «Динамо Ставрополь» — 46.
3. «Севастополь» — 44.
4. «Победа» — 44.
5. «Ростов-2» — 38.
6. «Шъачэ-2» — 37.
7. «Зэкъошныгъ» — 37.
8. «Нарт» – 36.
9. «Астрахань» — 36.
10. «Рубин Ялта» — 28.
11. «Легион» — 28.
12. «Ангушт» — 21.
13. «Спартак-Налщык» — 14.
14. «Динамо-2» — 2.