ГандболымкIэ Урысыем и Суперлигэ хэт «АГУ-Адыифыр» Iоныгъом и 4-м пчыхьэм сыхьатыр 7-м Мыекъуапэ щыIукIэщт командэу «Ладэм» (Тольятти). Адыгэ къэралыгъо университетым и Ордэунэу Кобл Якъубэ ыцIэ зыхьырэм ар щыкIощт. Мы спорт лъэпкъыр зыгу рихьыхэрэр ащ еплъынхэу зэхэщакIохэм рагъэблагъэх.

«Ладэр» Урысыем икомандэ анахь лъэшхэм ащыщ. Ащ удешIэныр сыдигъуи псынкIэп. Ау «АГУ-Адыифыр» Мыекъуапэ щыджэгущт, цIыфыбэ фэгумэкIыщт. Ащ типшъашъэхэм кIуачIэ къаритынэу тэгугъэ. Командэм итренер шъхьаIэу Никита Голуб къызэриIуагъэмкIэ, гандболисткэхэр зэнэкъокъум фэхьазырых, текIоныгъэр къыдахыным фэбэнэщтых.