Адыгеим и Правительствэ и Унэ министрэхэм я Кабинет изэхэсыгъоу щыкIуагъэр зэрищагъ ащ и Тхьаматэу КIэрэщэ Анзаур.

Iофыгъо шъхьаIэу зытегущыIагъэхэм ащыщ псэупIэ-коммунальнэ хъызмэтым ипсэуалъэхэр бжыхьэ-кIымэфэ уахътэм зэрэфагъэхьазырхэрэр. АР-м псэолъэшIынымкIэ, транспортымкIэ, псэупIэ-­коммунальнэ ыкIи гъогу хъызмэтымкIэ иминистрэ иапэрэ гуадзэу Лафышъэ Рэмэзан къызэриIуагъэмкIэ, фабэр унэ­хэм къязытырэ котельнэ 260-рэ, пункт 25-рэ, фабэм икIуапIэу километрэ 288-рэ, гъэстыныпхъэ шхъуантIэм икIуа­пIэу километрэ мини 5-м ехъу, псыкъы­чIэ­щыпIэ 282-рэ, псы къабзэм ыкIи шIоим якIуапIэу километрэ мини 2,2-рэ, фэтэрыбэу зэхэт унэ 1988-рэ агъэхьазыры.
Ростехнадзорым и Темыр Кавказ ГъэIорышIапIэ илIыкIохэр зыхэт меж­ведомственнэ комиссиехэм жъоныгъокIэ мазэм къыщегъэжьагъэу зэкIэ муниципалитетхэм Iоф ащашIэ. ЩыкIагъэу къыхагъэщыгъэхэр охътэ кIэкIым да­гъэзыжьынхэу, 2025-рэ илъэсым иIо­ныгъо мазэ ыкIэм нэс а IофшIэнхэр аухынхэу ыкIи шэкIогъум и 15-м шIомыкIэу зэрэхьазырхэр къэзыушыхьатырэ тхылъхэр аIэкIэлъынхэу муниципальнэ образованиехэми, фабэр къэзытырэ организациехэми пшъэрылъ афашIыгъ.
КIэрэщэ Анзаур псэупIэ-коммунальнэ хъызмэтым епхыгъэ псэуалъэхэр хэзыгъэ имыIэу шапхъэхэм адиштэу игъом зэтырагъэуцонхэу, фабэм ыпкIэ игъом къэзымытыгъэхэм чIыфэу ателъыр нахь макIэ шIыгъэным Iоф дашIэнэу, чIыфэхэр зэрафыкIалъытыкIыжьыщт графикым дэмыхынхэу афигъэпытагъ.
«Унэхэм ягъэфэбэгъу уахътэ тыфэхьазырэу текIолIэным пае муниципалитет пэпчъ гъогу кар-
тэу къэкIуапIэхэр къызщыушы­хьатыгъэр иIэн фае. Ар шIокI имыIэу зэкIэми агъэцэкIэнэу щыт. Шъо­лъырым псэолъэшIынымкIэ и Министерствэрэ муниципалитетхэм япащэхэмрэ хэукъоныгъэхэм ядэгъэзыжьын анаIэ тырагъэтын фае. ПсэупIэ-коммунальнэ хъызмэтым епхыгъэ псэуалъэхэр зэкIэ игъом гъэхьазырыгъэнхэр шIокI зимыIэ Iоф. Ащ фэдэ пшъэрылъ республикэм и ЛIышъхьэ къыгъэуцугъ», — къыкIигъэтхъыгъ КIэрэщэ Анзаур.
Нэужым АР-м икъэралыгъо программэу «Содействие занятости населения» зыфиIорэр 2025-рэ илъэсым иапэрэ мэзих гъэцэкIагъэ зэрэхъугъэм тегущыIагъэх. ЦIыфхэм IофшIэпIэ чIыпIэхэр ягъэгъотыгъэнхэмкIэ къэралыгъо къулыкъум и ГъэIорышIапIэ ипащэу Галина Цыганковам зэрэщигъэгъозагъэхэмкIэ, IофшIапIэ зимыIэхэм япчъагъэ къеIы­хыгъ. 2025-рэ илъэсым иапэрэ мэзих зэрагъэунэфыгъэмкIэ, Iоф зышIэн зы­лъэкIынэу республикэм исым ипроцент 0,4-р ары ар зимыIэр. Ау IофшIэпIэ чIыпIэу щыIэр 5000-м къыщыкIагъэп.
IофшIэпIэ чIыпIэхэм яермэлыкъхэр гъогогъу 34-рэ а уахътэм зэхащагъ, нэбгырэ 21-мэ ежьмэ яIоф къызэIуа­хыгъ, сэнэхьат е сэнэхьат тедзэ зэрагъэгъотынэу нэбгырэ 90-рэ агъэкIуагъ, охътэ гъэнэфагъэкIэ IофшIапIэм Iуа­гъэхьагъэр 623-рэ мэхъу.
Монополием пэшIуекIогъэнымкIэ Федеральнэ къулыкъум АР-мкIэ и ГъэIорышIапIэ ипащэу ХьэпэкIэ Аслъан Адыгэ Республикэм иминистрэхэм я Кабинет унитарнэ хъызмэтшIапIэхэм яреформэ зэрифэшъуашэм тетэу шъо­лъырым зэрэщыпхырищыгъэм фэшI рэзэныгъэ тхылъэу къыфагъэшъошагъэр зэхэсыгъом щаритыжьыгъ.
Зэхэсыгъом икIэухым КIэрэщэ Ан­заур шъолъырхэм хэхъоныгъэ ягъэшIыгъэнымкIэ Комиссиеу Урысые Федерацием и Правительствэ щызэхащагъэм и Президиум Адыгеим ыгъэхьазырыгъэ проектхэм атегущыIи къызэрадыригъэ­штагъэм щигъэгъозагъэх. Адыгеим ими­нистрэхэм я Кабинет и Тхьаматэ псымкIэ шъолъырым исистемэ игъэкIэ­жьынкIэ проектхэм япхырыщын ищы­кIэгъэ тхылъхэм ыкIи зэнэкъокъухэм ягъэхьазырын анаIэ тырагъэтынэу муни­ципалитетхэмрэ нэмыкI къулыкъоу ащ хэлажьэхэрэмрэ къафигъэпытагъ.