БлэкIыгъэ тхьамафэм АР-м и Сатыу-промышленнэ палатэ зимычэзыу зэхэсыгъоу иIагъэм ащ итхьамэтакIэ щыхадзыгъ.

Iофтхьабзэм хэлэжьагъэх УФ-м и Сатыу-промышленнэ палатэ шъолъыр­хэм хэхъоныгъэ ягъэшIыгъэнымкIэ и Департамент ипащэу Александр Антоновыр, гъунэгъу Краснодар кра-
им и Сатыу-промышленнэ палатэ ипащэу Александр Ткаченкэр, Адыгеим ифермерхэм я Союз ипащэу Дзэ­хъохъу Аслъан, АР-м ипредприни­мательхэм яфитыныгъэхэр къэухъу­мэгъэнхэмкIэ Уполномоченнэу Къонэ Азамат, нэмыкIхэр.
НахьыпэкIэ, илъэсибгъу фэдизрэ, Союзэу «АР-м и Сатыу-промышленнэ палатэ» ипэщэгъэ Тхьаркъэхъо Пщымафэ ипсауныгъэ изытет ыпкъ къикIэу IэнатIэр ежь ишIоигъоныгъэкIэ къыгъэтIылъыжьыгъ. Ащ ычIыпIэ зэкIэ палатэм хэтхэм зэдырагъаштэу хадзыгъ организацием ипащэ игодзагъэу Гъыщ Марат.
Александр Антоновыр къызэгущыIэм, Тхьаркъохъо Пщымафэ шъолъырым бизнесым зыщиушъомбгъуным иIахь мымакIэу зэрэхилъхьагъэм, ипшъэ­рылъхэр хэзыгъэ имыIэу зэригъэцэкIагъэхэм пстэумэ апэу къыкIигъэтхъыгъ, зэрэфэразэхэр къыхигъэщыгъ, тапэкIэ гухэлъэу иIэхэр пхырищышъунхэу фэлъэIуагъ.
«УФ-м и Сатыу-промышленнэ палатэ бизнесым пае фэIо-фэшIэ 500-м ехъу, къэралыгъо мэхьанэ зиIэхэри, экспертизэри, сертификатхэм ятыни зэра­хэтхэу, егъэцакIэ. Джащ фэдэу предпринимательхэм апае ермэлыкъхэм, къэ­гъэлъэгъонхэм язэхэщэн ыуж ит. А зэпстэур щыIэныгъэм икъоу пхыры­щыгъэнхэм, шIуагъэ къытэу палатэм иIофшIэн лъыгъэкIотэ­гъэным Гъыщ Ма­рат зэрэдэлэ­жьэшъущтым, ащ фытегъэ­псыхьэгъэ командэ зэригъэпсыщтым, бизнесым пылъхэм зэп­хыныгъэ пытэ зэрадыриIэщтым тицыхьэ телъ», — къыIуагъ ащ.
Нэужым Сатыу-промышленнэ палатэм и Совет агъэнэфагъ ыкIи ащ хэтыщтхэр хадзыгъэх. Лъэныкъо зэфэшъхьафхэм ащылэжьэрэ предприни­мательхэр ащ хагъэхьагъэх. Джащ фэдэу Гъыщ Марат тапэкIэ иIофшIэн зэрэзэхэщэгъэщтым къытегущыIагъ. Палатэм хэтыр нахьыбэ хъуным, бизнесым пае фэIо-фашIэу шъолъырым щагъэцакIэхэрэм ахэгъэхъогъэным анахьэу ынаIэ зэратетыщтыр ащ къыхигъэщыгъ, илъэситIу благъэм зэшIохыгъэн фэе Iофхэм нэIуасэ афишIыгъэх.