КультурэмкIэ дунэе кIэлэцIыкIу форумэу Москва щы­кIуагъэм Адыгеим иныбжьыкIэ къэшъокIо купэу «Мыекъуапэ инэфылъэхэр» зыфиIорэр хэлэжьагъ.

Iофтхьабзэм кIэщакIо фэхъугъэх ­Адыгэ Республикэм культурэмкIэ и Ми­нистерствэрэ федеральнэ къэралыгъо бюджет учреждениеу «Росконцерт» зыфиIорэмрэ.
Я IV-рэ Дунэе кIэлэцIыкIу культурнэ форумым Урысыем щыпсэурэ ныбжьыкIэхэу сэнаущыгъэ зыхэлъхэр зэфи­щагъэх.
Урысыем ишъолъырхэр зэкIэ ащ хэлэжьагъэх, нэбгырэ минитIум ехъу щы­зэрэугъоигъ. Джащ фэдэу IэкIыб къэ­ралыгъо 15-мэ къарыкIыгъэхэр Iоф­тхьабзэм еблэгъагъэх, шIэныгъэу ыкIи Iэпэ­Iэсэныгъэу аIэкIэлъымкIэ зэхъожьынхэ амал ахэм яIагъ.
Урысыем ыкIи нэмыкI хэгъэгухэм арыс ныбжьыкIэхэм культурэмрэ ис­кусствэмрэ алъэныкъокIэ дунэе гъэхъа­гъэхэм нэIуасэ зафашIын алъэкIыгъ. Ахэр къэралыгъо, общественнэ Iофы­шIэхэм, культурэм илIыкIохэм, кIэлэ­егъэджэ цIэрыIохэм аIукIагъэх.
Iофтхьабзэр къызэIуихыгъ Урысые Федерацием культурэмкIэ иминистрэу Ольга Любимовам.
— Дунэе кIэлэцIыкIу культурнэ форумым илъэси 4 хъугъэу Урысыем щыпсэурэ ныбжьыкIэхэу сэнаущыгъэ зыхэлъхэр зэфещэх. Культурэм, искусствэм цIыфыр апIу, щыIэныгъэм фагъасэ. ОрэдыIохэм, къэшъуакIохэм, сурэтышIхэм ыкIи нэмыкIхэм шIэныгъакIэхэр зэрагъэ­гъотыщтыгъ. Дунаим тет цIыф лъэпкъхэм зыкIыныгъэ тиIэу, мамырэу тызэрэзэдэпсэурэр Iофтхьабзэм къеушыхьаты. Культурэм хэхъоныгъэ едгъэшIызэ тигъэхъагъэхэм зэрахэдгъэхъощтым щэч хэлъэп, — къыIуагъ Ольга Любимовам.
Тикуп ипащэу, Урысыем культурэмкIэ изаслуженнэ IофышIэу, Адыгеим изаслуженнэ артистэу Нэныжъ Айдэмыр пэIудзыгъэ шIыкIэм тетэу тыдэгущыIагъ. Ащ къызэриIуагъэмкIэ, Iофтхьабзэм къы­­дыхэлъытагъэу десэхэр, зэIу­кIэгъу­хэр, мастер-классхэр, къэгъэлъэгъонхэр ныбжьыкIэхэм афызахащагъэх. Зэхахьэм къыщышъуагъэх, IэшIэгъабэхэм яшIыкIэ-­амалхэр зэрагъэшIагъэх, Iофтхьабзэм хэлажьэхэрэр нэIуасэ зэ­фэхъугъэх.
— Мыщ къыдыхэлъытагъэу культурэм иIофышIэхэм зэIукIэгъухэр адытиIагъ, лекциехэм, мастер-классхэм, арт-еджапIэхэм, экскурсиехэм, артист цIэрыIохэм ядесэхэм ыкIи нэмыкI Iофтхьабзэхэм тахэлэжьагъ. Лъэпкъ зэфэшъхьафхэм ащыщхэр ныбджэгъу зэфэхъугъэх, хореограф цIэрыIоу Егор Дружи­ниным имастер-классэу «Непэрэ ма­фэм диштэрэ къэшъуакIэхэр» зыфиIорэм ашIогъэшIэгъонэу хэлэжьагъэх. Московскэ Губернскэ театрэм ипащэу, артист цIэрыIоу Сергей Безруковым, Московскэ ­къэралыгъо циркым ипащэу Эдгард Запашнэм таIукIагъ, — къыIуагъ Нэныжъ Айдэмыр.
«Мыекъуапэ инэфылъэхэм» зэфэхьысыжь концертым адыгэ къэшъо пчъагъэ зыщызэхэугъоегъэ къэгъэлъэгъон къыщашIыгъ. Адыгэ къашъохэр къэзэрэугъои­гъэхэм зэрашIогъэшIэгъоныгъэр купым ипащэ къыхигъэщыгъ. Гуфэбэныгъэрэ шIэныгъэрэ къызхахыгъэ форумыр ­мэфэкI шIыкIэм тетэу зэфашIыжьыгъ. Лъэпкъ зэфэшъхьафхэу ащ щызэIукIагъэхэм язэпхыныгъэ лъагъэкIотэщт.
Адыгеим икультурэ тилъэпкъ къа­шъохэмкIэ тыди щызэлъязыгъэшIэрэ купым Мыекъуапэ къыгъэзэжьыгъ.