Адыгеим и ЛIышъхьэу КъумпIыл Мурат нэбгырэ 1100-рэ зычIэфэщт еджапIэу Мыекъуапэ щагъэпсыгъэм икъызэIухын хэлэжьагъ.

МэфэкI Iофтхьабзэм къекIолIагъэх АР-м и Къэралыгъо Совет — Хасэм и Тхьаматэ игуадзэу Цэй Эдуард, федеральнэ инспектор шъхьаIэу Сергей Дрокиныр, гъэсэныгъэмрэ шIэныгъэм­рэкIэ министрэу Евгений Лебедевыр, Мыекъуапэ имэрэу Геннадий Мит­рофановыр, программэу «ЛIыхъужъхэм яуахът» зыфиIорэм хэлэжьэрэ Сергей Ковалевыр, Урысыем и ЛIыхъужъэу Роман Тороховым иунагъо исхэм ащыщхэр. ЕджапIэм ЛIыхъужъэу Ро- ман Тороховым ыцIэкIэ еджагъэх.
Лъэпкъ проектэу «Гъэсэныгъэм» къы­дыхэлъытагъэу гурыт еджапIэу N 1-р ашIыгъ. Ащ сомэ миллиард 1,27-м ехъу къыфыхагъэкIыгъ, Iэмэ-псымэхэм якъэ­щэфын сомэ миллион 212-рэ пэIуагъэ­хьагъ. Микрорайонэу Михайловым щыпсэурэ кIэлэцIыкIухэр зыщеджэщтхэ чIыпIэхэр игъэкъугъэнхэмкIэ мыщ амалышIу къытыщт, нафэу зэрэщытымкIэ, а чIыпIэм еджапIэу N 17 закъор ары итыр. НепэкIэ гъэсэныгъэ зыщарагъэгъотыщт учреждениякIэм кIэлэцIыкIу 600 фэдиз аштэгъах.
МэфэкI линейкэм республикэм и ЛIышъхьэ шIэныгъэм и Мафэрэ еджэпIакIэм икъызэIухынрэ афэгъэхьыгъэ гущыIэ фабэхэу кIэлэеджакIохэм, ны-тыхэм ыкIи кIэлэегъаджэхэм афэгъэхьыгъэхэр къыщиIуагъэх. КъумпIыл Мурат къызэрэхигъэщыгъэмкIэ, еджапIэм къе­шIэкIыгъэ чIыпIэр зэтегъэпсыхьэгъэным епхыгъэ IофшIэнхэр макIох.

«Анахьэу къыхэзгъэщынэу сызыфаер еджэпIакIэм тичIыпIэгъоу, Урысыем и ЛIыхъужъэу Роман Тороховым ыцIэ зэрихьыщтыр ары, и Хэгъэгу ишъхьафитыныгъэ къыухъу­мэзэ хэушъхьафыкIыгъэ дзэ операциер зыщыкIорэ чIыпIэм ар щы­фэхыгъ. Мыщ къычIэхьэрэ кIэлэ­еджакIо пэпчъ ЛIыхъужъым ыцIэ зыхьыщт еджапIэм зэрэчIэсым рыгушхон, пшъэдэкIыжь зэрихьырэр зэхишIыкIын фае», — къыIуагъ АР-м и ЛIышъхьэ.
КъумпIыл Мурат къызэрэхигъэщыгъэм­кIэ, гъэсэныгъэм ылъэныкъокIэ респуб­ликэм Iофышхо щэкIо: еджэпIакIэхэр агъэпсых, жъы хъугъэхэр агъэцэкIэжьых, кIэлэегъэджэ ныбжьыкIэхэр ахэм ащы­лэжьэнхэм анаIэ тырагъэты.
Республикэм и ЛIышъхьэ игукъэкIыкIэ илъэс къэс, хабзэ зэрэхъугъэу, «Апэрэ классым кIорэм ишIухьафтын» зыфиIорэ Iофтхьабзэм диштэу кIэлэцIыкIуи 110-мэ Iалъмэкъхэмрэ еджапIэм щагъэфедэщт Iэмэ-псымэхэмрэ аратыжьыгъэх. Зэхэубытагъэу къэпIон хъумэ, апэрэ классым кIогъэ кIэлэцIыкIу мини 6-мэ ащ фэдэ шIухьафтынхэр аратыгъэх. Ахэм анэмыкIэу Херсон хэкум ис кIэлэеджакIохэм шIухьафтын 775-рэ афарагъэщагъ.

Ащ нэужым КъумпIыл Мурат еджэпIакIэу ашIыгъэм иамалхэм нэIуасэ зафишIыгъ. КъумпIыл Мурат къызэ­рэхигъэщыгъэм­кIэ, еджапIэу Урысыем и ЛIыхъужъэу Торохов Роман Сергей ыкъом ыцIэкIэ щытым гъэсэныгъэм нэмыкIэу пIуныгъэ IофшIэнри нахь дэгъоу щызэхэщэгъэн, кIэлэцIыкIухэр я Хэгъэгу фэшъыпкъэхэу къэтэджынхэм дэлэжьэнхэ фае.
Нэужым УФ-м и ЛIыхъужъ имыжъосыни къызэIуахыгъ. Ащ нэфэшъхьафэу гвардием иполковникэу Роман Тороховым исурэт еджэпIэ дэпкъым тыра­шIыхьан мурад яI. ГуфакIохэм яотряд ащ ыцIэкIэ еджэщтых, тичIыпIэгъухэу Хэгъэгур къэзыухъумэхэрэм ямузей мы еджапIэм къыщызэIуахыщт.
«Лъэпкъ проектэу «Гъэсэныгъэм­рэ» УФ-м и Президент еджапIэхэм ягъэцэкIэжьынкIэ кIэщакIо зыфэхъугъэ программэмрэ яшIуа­гъэкIэ республикэм гъэсэныгъэм исистемэ хэхъоныгъэ ышIынымкIэ амал инхэр иIэ хъугъэ. А амалхэр зэрифэшъуашэу къызфэдгъэфедэнхэм ренэу тынаIэ тетэгъэты: цIыфхэр зыщыпсэухэрэ районыкIэхэм кIэлэцIыкIухэр зыщеджэщтхэ унэхэр ащытэгъэпсых, джырэкIэ щыIэ еджа­пIэхэр зы сменэм тетэщэх. Гухэлъэу тиIэр зэрэреспубликэу кIэлэцIыкIухэм шIэныгъэ дэгъу ягъэ­гъотыгъэным иамал иIэныр, тихэгъэгу ифэшъошэ цIыфхэу ахэр пIугъэнхэр ары. МыщкIэ кIэлэегъа­джэхэм ямызакъоу, ны-тыхэми яшIуагъэ къытагъэкIыным тыщэгугъы», — къыIуагъ КъумпIыл Мурат.
Мы еджапIэм нэфэшъхьафэу шIэныгъэм и Мафэ тефэу республикэм джыри еджэпIитIу къыщызэIуахыгъ: къэлэ гъэпсыкIэ зиIэ псэупIэу Яблоновскэм щашIыгъэу нэбгырэ 1100-м телъытагъэм­рэ псэупIэу Табачнэм нэбгырэ 250-рэ зычIэфэщт еджапIэу щашIыгъэмрэ. Мы аужырэ илъэси 6-м Адыгеим кIэу еджэпIи 10 щашIыгъ, ахэм кIэлэцIыкIу 9700-м ехъу непэ ачIэс.
ЕджапIэхэм яигъэкIотыгъэ гъэцэкIэ­жьынкIэ программэм къыдыхэлъытагъэу илъэси 4-м еджэпIэ 28-рэ агъэцэкIэ­жьыгъ. Мы илъэсым муниципалитет зэфэшъхьафхэм яеджэпIи 9-мэ игъэкIотыгъэ гъэцэкIэжьынхэр ащыкIуагъэх, илъэсыкIэ еджэгъум иублэгъум респуб­ликэм иеджапIэхэр зэкIэ фэхьазырых. 2026 — 2027-рэ илъэсхэм джыри еджэпIэ 18-мэ игъэкIотыгъэ гъэцэкIэжьынхэр арашIылIэнхэу агъэнэфагъ.

АР-м и ЛIышъхьэ ипресс-къулыкъу къытырэ къэбархэмкIэ
Тхьаркъохъо Сафыет.