Урысые Федерацием и Президент и Полномочнэ лIыкIоу Къыблэ федеральнэ шъолъырым щыIэ Владимир Устиновыр тыгъуасэ Адыгеим къэ­кIуагъ. ШIэныгъэм и Мафэ Полномочнэ лIыкIомрэ КъумпIыл Муратрэ Адыгэ къэралыгъо университетэу илъэс 85-рэ мыгъэ хъурэм щыIагъэх. Апшъэ­рэ еджа­пIэм иапэрэ курс ихьа­гъэхэм афашIыгъэ линейкэм ахэр хэлэжьагъэх.

Владимир Устиновыр АКъУ-м иректорэу Мамый Даутэ, кIэлэегъаджэхэм, студентхэм илъэсыкIэ еджэгъур зэрэрагъэжьагъэмкIэ къафэгушIуагъ, анахьэу къахигъэщыгъэх а 1-рэ курсым ихьагъэ­хэр. Хэгъэгум и Къыблэ иапшъэрэ еджа­пIэхэу осэшхо зыфашIыхэрэм ащыщым ахэр зэрэщеджэщтхэм къыкIигъэтхъыгъ. Университетым хэгъэгум инаукэрэ гъэсэныгъэмрэ язегъэушъомбгъун иIахьышхо хешIыхьэ. АКъУ-р къэзыухыхэрэр Урысыем ичIыпIэ зэфэшъхьафхэм зэращылажьэхэрэм нэмыкIэу, дунаим ихэгъэгу 30-мэ къарыкIырэ студентхэри мыщ щеджэх.
Полномочнэ лIыкIом ишIуфэс гущыIэ къыщыхигъэщыгъ обществэм изэкъогъэ­уцонкIэ пIуныгъэмрэ гъэсэныгъэмрэ мэхьанэшхо зэряIэр.
«УФ-м и Президентэу Владимир Пути­ным мызэу, мытIоу зэрэхигъэ­унэфыкIыгъэмкIэ, Урысыем пIэлъэ кIыхьэм те­лъытэгъэ гъэхъагъэхэр ышIынхэмкIэ лъапсэр гъэсэныгъэ дэгъу ягъэгъотыгъэ­ныр ары. Мыщ дэжьым къэIогъэн фае гъэсэны­гъэм, наукэм, экономикэм зэпхыныгъэ пытэ зэрэзэдыряIэн, научнэ гъэ­хъагъэхэр икъоу хэгъэгум ищы­нэгъончъагъэ, исуверенитет, цIыф­хэм ящы­IэкIэ-псэукIэ нахьышIу шIыгъэным зэрафэлэжьэнхэ фаер. АКъУ-м ар дэгъоу къащыгурэIо ыкIи ащ игъэцэкIэн щыпылъых, — къыIуагъ Владимир Устиновым.
Адыгеим и ЛIышъхьэ шIэныгъэм и МафэкIэ пстэуми къафэгушIуагъ, шъхьа­фэу Владимир Устиновым «тхьауегъэ­псэу» риIуагъ илъэсыкIэ еджэгъум иуб­лэгъоу АКъУ-м щагъэмэфэкIырэм къызэрэкIуагъэм фэшI.
«Республикэмрэ Адыгэ къэралыгъо университетымрэ зэдэлэжьэныгъэ пытэ зэдыряI. Владимир Путиным апшъэрэ еджапIэмрэ шъолъыр­хэмрэ апашъхьэ къыригъэуцорэ пшъэрылъхэр тызэгъусэу зэшIотэ­хых. Адыгеир ыпэкIэ лъызыгъэ­кIотэрэ, хэгъэгум игъэпытэн фэIорышIэрэ специалистхэу IэпэIэсэныгъэшхо зыхэлъхэр мыщ къыщагъэ­хьазырых. Апшъэрэ еджапIэм научнэ амалэу иIэхэр республикэмкIэ зигъо Iофыгъохэм язэшIохын фэла­жьэх», — къыIуагъ КъумпIыл Мурат.
Апшъэрэ еджапIэм гъогоу къыкIугъэм къытегущыIэзэ, Адыгеим и ЛIышъхьэ университетым иIофышIэхэу, ащ къы­чIэкIыгъэхэу Хэгъэгу зэошхоми, нэмыкI заохэми ялъэхъан зичIыгу гупсэ къэзыухъумагъэхэм лъэшэу зэрафэразэр къы­Iуагъ. КъумпIыл Мурат зэрэхигъэунэфыкIыгъэмкIэ, АКъУ-м истудент 37-у, изы кIэлэегъаджэу непэ хэушъхьафыкIыгъэ дзэ операцием хэлажьэхэрэм нахьыжъхэм ахэлъыгъэ хэбзэшIухэр лъагъэкIуатэх. ХэушъхьафыкIыгъэ дзэ операцием хэлажьэхэрэм яунагъохэм арыс нэбгырэ 69-рэ мы университетым щеджэ.
АКъУ-м иректорэу Мамый Даутэ Адыгэ къэралыгъо университетым иунэгъо зэгурыIожь хэхьагъэхэм къафэгушIуагъ, студентхэм ариIуагъ университетым амалэу къытыхэрэр икъоу къызфагъэфедэнхэу.
АКъУ-р Урысыем иапшъэрэ еджэпIэ анахь дэгъуи 100-мэ зэращыщыр, программэу «Приоритет-2030» зыфиIорэм зэрэхэлажьэрэр, научнэ консорциумэу «Вернадский — Республика Адыгея» зыфиIорэм иопорнэ апшъэрэ еджапIэу зэрэщытыр линейкэм щыхагъэунэфы­кIыгъ. АКъУ-м джащ фэдэу хэхьэх научнэ-ушэтэкIо институтыр, гъэсэныгъэмкIэ Урысые академиеу ЮФО-м щыIэм и Адыгэ научнэ гупчэ, научнэ еджэпIи 10-р, лаборатории 5-р. Джащ фэдэу ботаническэ сади, Кавказ научнэ хьисап гупчи ащ щызэхэщагъэх.
АР-м и ЛIышъхьэ ипресс-къулыкъу къы­тырэ къэбархэмкIэ ЛIышэ Саныет.