Адыгеим и ЛIышъхьэу КъумпIыл Мурат шъолъырхэм хэ­хъоныгъэ ягъэшIыгъэнымкIэ Комиссиеу Урысые Федерацием и Правительствэ щызэхащагъэм и Президиум изэхэсыгъо видеоконференцие шIыкIэм тетэу хэлэжьагъ. Ар зэрищагъ Комиссием ипащэу, Урысыем и Правительствэ и Тхьаматэ игуадзэу Марат Хуснуллиным.

Лъэпкъ проектэу «ЩыIэныгъэм пае инфраструктурэр» зыфиIорэм ыкIи лъэ­ныкъо зэфэшъхьафхэмкIэ федеральнэ программэхэм япхырыщын ащ щатегущыIагъэх. Джащ фэдэу инфраструктурэм епхыгъэ проектхэм апае чIыфэхэр аратынхэм фытегъэпсыхьэгъэ тхылъэу УФ-м ишъолъырхэм къагъэхьазырыгъэ­хэм ахэплъагъэх.
Адыгеири ахэм ащыщ. КъумпIыл Мурат инфраструктурэм епхыгъэ проекти 4-у сомэ миллион 432-рэ зытефэрэр зэхэсыгъом къыщигъэлъэгъуагъ. Ахэр къалэу Мыекъуапэрэ поселкэу Инэмрэ псымкIэ ясистемэхэм ягъэкIэжьын фытегъэпсыхьагъэх. Проектхэм атегущыIэхи, къадырагъэштагъ.
Ащ тетэу Адыгеим икъэлэ шъхьаIэ ипсырыкIуапIэхэу километрэрэ метрэ 900-рэ щызэблахъущт, нахьыпэкIэ аэро­портыр зыдэщыIэгъэ лъэныкъомкIэ километри 7,7-рэ кIэу щашIыщт. Мы районым фэгъэкIотэнхэр зиIэ цIыф купхэм унэхэр ащашIынхэу чIыгу Iахьхэр щаратыгъэх. Ахэм псыр афыращэлIэнэу ары зыуж итхэр.
Адрэ проектыр поселкэу Инэм псыкъычIэщыпIэхэр щыгъэуцугъэнхэм тегъэ­псыхьагъ. Джащ фэдэу километри 6 псы къабзэм, километри 5,6-рэ псы шIоим якIуапIэхэу щагъэпсын гухэлъ яI. ПсэупIэм цIыфэу дэсхэм зэпыу фэмыхъоу псы къабзэр аIэкIэхьанымкIэ а пстэуми яшIуагъэ къэкIощт, унакIэхэри, сабыибэ зиIэ унагъоу чIыгу Iахьхэр зэратыгъэхэм къашIыхэрэри зэрахэтхэу, арапхыщтых.
Псэуалъэу республикэм ипащэ зигугъу къышIыгъэхэр коммунальнэ инфраструктурэм ишIынкIэ ыкIи игъэкIэжьынкIэ шъолъыр планэу 2030-рэ илъэсым нэс телъытагъэм хэгъэхьагъэх. Ахэм япхырыщын чIыфэу къатыщтым имызакъоу, мыбюджет къэкIуапIэхэм къахэкIыгъэ мылъкуи пэIуагъэхьащт.
Марат Хуснуллиным федеральнэ ахъщэу инфраструктурэм епхыгъэ проектхэм апае къафатIупщыщтым игъэфедэнкIэ шъолъырхэм япащэхэм пшъэ­рылъхэр къафишIыгъэх.
«Мыщ фэдэ проектхэм тапэкIи тахэплъэщт, тштэщтых. Шъо­лъырхэм хэхъоныгъэ ягъэшIыгъэнымкIэ Правительствэм и Комиссие и Президиум шъолъыр 20-мэ япроект 53-мэ адыригъэштагъ. Ахэм япхырыщын пае пстэумкIи сомэ миллиард 27,6-рэ фэдиз ттIупщыщт. Джы псэупIэ-коммунальнэ хъызмэтым игъэ­кIэжьын ылъэныкъокIэ, непэрэ проектхэри зэрахэтхэу, 57-рэ тштагъэ, ахэм сомэ миллиарди 146,75-рэ ауасэу мэхъу. Шъолъырхэм япащэхэм зэзэгъыныгъэхэм якIэтхэнрэ IофшIэнхэр зэшIохыгъэ зэрэхъухэрэмрэ ежьхэм ашъхьэкIэ анаIэ тетын фае. Проектхэм нэбгырэ минишъэ пчъагъэхэмкIэ мэхьанэ яI, ахэм яшIуагъэкIэ коммунальнэ фэIо-фашIэхэр зэрафагъэцакIэхэрэр нахьышIу хъущт», — къыкIигъэтхъыгъ Правительствэм и Тхьаматэ игуадзэ.
Адыгеим и ЛIышъхьэ Марат Хуснуллиным, Урысыем псэолъэшIынымкIэ и Министерствэ, чIыпIэхэм хэхъоныгъэ ягъэшIыгъэнымкIэ Фондым, нэмыкI федеральнэ министерствэу къыхэлажьэ­хэрэм ащ фэдэу шъолъырымкIэ мэхьанэшхо зиIэ проектхэм япхырыщынкIэ IэпыIэгъу къызэрафэхъухэрэм фэшI зэрафэразэхэр къыхигъэщыгъ.
«Непэ къызэрэддежъугъэштагъэр тикоммунальнэ Iофыгъохэм ядэгъэзыжьынкIэ, псым исистемэ зегъэу­шъомбгъугъэнымкIэ IэпыIэгъушхо къытфэхъущт, цIыфхэм зэпыу фэмыхъоу псыр аIэкIэхьанымкIэ, псэупIэхэм яшIынкIэ ишIуагъэ къы­тэкIыщт», — къыIуагъ КъумпIыл Мурат.
Шъугу къэдгъэкIыжьын, проектэу агъэнэфагъэхэм анэмыкIэу, псым епхыгъэ системэм игъэкIэжьынкIэ IофшIэнышхо Адыгеим щызэшIуахы. Лъэпкъ проектэу «ЩыIэныгъэм пае инфраструктурэр» зыфиIорэм къыдыхэлъытагъэу къутырхэу Ореховым, Тихоновым, Пентюховым ыкIи Чикаловым псыкъы­чIэщыпIэхэр мы илъэсым кIэу ащашIыщтых, яIэхэр ащагъэкIэжьыщтых, станицэу Дондуковскэм псырыкIуапIэхэр щагъэпсыщтых, Мыекъуапэ чIыпIэ 14-мэ ахэр ащызэблахъущтых.