Адыгеим и ЛIышъхьэ 2025-рэ илъэсым шышъхьэIум и 29-м ышIыгъэ Указым диштэу Долэ Долэт Налбый ыкъор Адыгэ Республикэм лъэпкъ IофхэмкIэ, IэкIыб къэралхэм ащыпсэурэ зэлъэпкъэгъухэм адыряIэ зэпхыныгъэхэмкIэ ыкIи къэбар жъугъэм иамалхэмкIэ и Комитет итхьаматэу агъэнэфагъ.

Адыгэ Республикэм и Комитетэу чIыпIэ зыгъэIорышIэжьынымкIэ къулыкъухэм адэлажьэрэм итхьаматэ игуадзэу ыпэкIэ ар щытыгъ.
Долэ Долэт Комитетым иIофышIэхэм, республикэмкIэ къэбарлъыгъэIэс амал­хэм япащэхэм тыгъуасэ аIукIагъ. ТхьамэтакIэм нэIуасэ фашIыхэ зэхъум щыIагъэх АР-м и ЛIышъхьэрэ АР-м иминистрэхэм я Кабинетрэ я Администрацие ипащэу Владимир Свеженец, 2011-рэ илъэсым къыщегъэжьагъэу Комитетым итхьаматэу щытыгъэ Шъхьэлэхъо Аскэр.
Долэ Долэт Комитетым ыпашъхьэ ит пшъэрылъхэр шIуагъэ къытэу ыгъэцэкIэнхэ, къэбарлъыгъэIэс амалхэм адыряIэ зэпхыныгъэхэм заригъэушъомбгъун зэрилъэкIыщтым яцыхьэ зэрэтелъыр ахэм къаIуагъ.
Комитетым итхьаматэу Долэ Долэт цыхьэ къызэрэфашIыгъэм фэшI зэрафэразэр къыIуагъ, республикэ хэбзэ къулы­къухэм яIофшIэн зэрэзэхащэрэр шъхьэ­ихыгъэу къэгъэлъэгъогъэнымкIэ, ахэм Iофэу ашIэрэм фэгъэхьыгъэ къэбархэр цIыфхэм икъоу аIэкIэгъэхьэгъэнымкIэ АР-м и ЛIышъхьэ пшъэрылъэу къафишIыгъэхэм ягъэцэкIэн акIуачIэ зэрэзэдырахьылIэн фаем зэIукIэм хэлэжьагъэхэм анаIэ тыраригъэдзагъ.