Нысхъэпэ театрэу «Дышъэ къошыным» иIофшIэгъэ лъэхъаныкIэ зыфегъэхьазыры. Андерсен ипшысэу «Дюймовочкэм» техыгъэ спектаклым дэлажьэх.

Адыгэ Республикэм изаслуженнэ артисткэу Нэгъой Зуриет сценариер ытхыгъ ыкIи спектаклыр ыгъэуцугъ. Пшысэ цIэрыIор иIэубытыпIэу непэрэ уахътэм диштэрэ гупшысэхэр IофшIагъэм гъэшIэгъонэу хилъхьагъэх.
— Спектаклым хэт геройхэр гъэшIэгъоных, зыр адрэм фэмыдэу, ящыIэныгъэ гъогу, ягупшысэхэр зэфэшъхьафхэу гъэпсыгъэх. Анахь гупшысэ шъхьаIэу къэгъэлъэгъоным хэ­лъыр игъо къызыскIэ тисабыйхэр ттытIупщынхэшъ, тафэсакъызэ ежьхэм ягъогу ядгъэкIунэу ары. Зыныбжь икъугъэ пшъэшъэжъыер ным зитIупщыкIэ зэрэфэгумэкIырэр, ащ ыгу къызэрэдищаерэр къэтэгъэлъагъо. Сыд фэдиз къин плъэгъуми, дэири дэгъури уилъфыгъэ зэпищэчышъоу, пытагъэрэ зэфагъэрэ хэлъэу зекIонэу зэрэбгъэсэн фаер пшысэмкIэ алъыдгъэIэсы тшIоигъу. Спектаклым орэд ыкIи къэшъо дахэхэр хэтых Нысхъэпэ театрэм иактерхэр джэгун сэнэхьатым лъэшэу фэlазэхэу рольхэр къашIы. Ны-тыхэми кIэлэцIыкIухэми ашIогъэшIэгъонэу гъэпсыгъэ,— къыIуагъ Нэгъой Зуриет.

Такъикъ 45-рэ къэгъэлъэгъоным икIыхьэгъэщт. Пшысэм хэт нэгъучIыцэ ныом ычIыпIэкIэ спектаклым феяр хагъэхьагъ. Ар режиссерым иекIолIэкIэ хэхыгъэмэ ащыщ. Нысхъэпэ дахэхэр, пцIашхъор, цыгъор, эльфхэм япщ, хьан­тIаркъохэр, шъомпIэжъхэр пшысэм дахэу къыщагъэлъэгъощтых.
«Дышъэ къошыным» иартистэу Виктория Токаренкэм феям ироль къешIы. КIэлэцIыкIухэр гъогу хьылъэу зытехьагъэхэм ар щадеIэ, гъэсэпэтхыдэхэр аре­Iох.
Къохъужъ Аминэт илъэсибл хъугъу Нысхъэпэ театрэм артистэу щэлажьэ. Iэдэб зыхэлъ пшъашъэхэм ярольхэр нахь къыдэхъухэу режиссерхэм алъытэ. Мызыгъэгуми Дюймовочкэм ироль ащ къытефагъ.
— Ролыр сыгу рехьы, мафэ къэс зы кIэ горэ хэсэгъуатэ. Нысхъапыр шIу слъэгъугъэ, «тызэгуры­Iоу» тызэдэлажьэ, — еIо Къохъужъ Аминэт.
Спектаклым мафэ къэс артистхэр дэлажьэх. «Дышъэ къошыным» илъэс IофшIэгъур дахэу ыублэщт. Iоныгъом и 28-м сыхьатыр 12-м апэрэу спектаклыр республикэ филармонием къыщагъэлъэ­гъощт.
Адыгэ Республикэм культурэмкIэ и Министерствэрэ АР-м и Концерт зэхахьэрэ зикIэщэкIо фестивалэу «Теат­ральное зазеркалье» зыфиIорэр чъэпыогъум щыIэщт. «Дышъэ къошыным» фестивалыр зэрэгъэшIэгъоныщтыр къыкIигъэтхъыгъ.
Лъэпшъыкъо
Фатим.